Тиксии бөһүөлэгэр түргэн тэтимнээх интэриниэт баар буолуоҕа

Бырайыагы «Полярнай экспресс» федеральнай бырагыраама чэрчитинэн 2026 сылга олоххо киллэриэхтэрэ. Бу туһунан Ил Дархан Айсен Николаев Булуҥ оройуонун ыччатын кытта көрсүһүүгэ иһитиннэрдэ.

Ил Дархан бэлиэтээбитинэн, Арктика бөһүөлэгэр түргэн тэтимнээх интэриниэт кэлиитэ олохтоох дьон-сэргэ сыыпаранан үөрэх платформатыгар үөрэнэллэригэр уонна бэйэлэрин IT-эйгэ бырайыактарын олоххо киллэриигэ көмөлөһүөҕэ. Саха сирин нэһилиэнньэлээх пууннарын түргэн тэтимнээх интэриниэтинэн хааччыйыыга икки бырайыак туһаныллар — федеральнай «Полярнай экспресс» уонна Айсен Николаев көҕүлээһининэн үлэлээбит  өрөспүүбүлүкэтээҕи «Арктика синергията».

«Арктика синергията» бырайыагы дойду Бэрэсидьиэнэ Владимир Путин өйөөбүтэ. Операторынан «АрктикТелеком» үлэлиир.