Тиксии олохтоохторо түргэнник ситэр дьиэ кыылын иитиэхтэрин баҕараллар

Тиксии бөһүөлэгин олохтоохторо куурусса сымыытын дэлэтиэхтэрин баҕараллар. Бөһүөлэк биир олохтооҕо  куурусса иитиитинэн дьарыктанарга бэлэмин эттэ. Оҥорон таһаарыы саҥа хайысхатын идиэйэтин СӨ Бырабыыталыстыбатын Бэрэссэдээтэлэ Андрей Тарасенко дьону кытта көрсүһэригэр эттилэр.

«Биһиги көрсүһүүгэ көтөр фабрикатын боппуруоһун быһаарсаары кэллибит. Чуолаан, бэйэ дьыалатын оҥосторго сайаапканы биэрэргэ ханнык докумуоннар ирдэнэллэрин, Бырабыыталыстыба өттүттэн туох көмө оҥоһуллуон сөбүн билээри гынабыт. Боппуруос аа-дьуо быһаарыллар буолла. Ол гынан баран, аан бастаан сайаапка бэриллиэхтээх. Салгыы кууруссалары тутар сири булуохпутун наада. Билиҥҥитэ бары ыйытыыларбытыгар сөптөөх хоруйу ылан астынныбыт, көмө баар буолуо», – диэн Юлианна Владимировна санаатын үллэһиннэ.

Ил Дархан Айсен Николаев ааспыт сыллааҕы Анал этиитигэр оройуоннарга түргэнник ситэр салааны сайыннарыыны өйүүр наадалааҕын эппитэ. Өрөспүүбүлүкэ баһылыга түргэнник ситэр дьиэ кыылын иитэргэ АПК-ны өйүүр пуонда нөҥүө тыа хаһаайыстыбатын оҥорон таһаарааччыларыгар уонна чааһынай дьоҥҥо иэс биэриини көрөр туһунан соруйбута.

«Оҥорон таһаарыыны тэрийэргэ кыһалҕа үксүн тырааныспар ороскуотун иһин тахсар, буоларын курдук, ол түргэнник ситэр дьиэ кыылын сыанатынааҕар үрдүк буолар. Ол иһин биһиги өттүбүтүттэн Арктика оройуоннарын олохтоохторугар, бэйэлэрин хаһаайыстыбаларын сайыннаралларыгар дьиэ кыылын уонна уотурбаны тириэрдиигэ көмө оҥоһуллуо. Ол дьиэ кэргэн экэниэмикэтин дохуотун улаатыннарыа. Бу Ил Дархан Айсен Николаев биһиги иннибитигэр туруорар соруга», – диэтэ Андрей Тарасенко.

СӨ Ил Дарханын уонна Бырабыыталыстыбатын пресс-сулууспата