Тиксиигэ ньиэп бородууктата тохтубут содулун туораталлар

СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтэ Булуҥ улууһун Тиксии бөһүөлэгэр ньиэп бородууктата тохтубут түбэлтэтинэн бэрэбиэркэ ыыппытын иһитиннэрэр.

Тохсунньу 27 күнүттэн Булуҥ улууһугар муниципальнай таһымнаах суһал ыксаллаах быһыы-майгы эрэсиимэ олохтонно.

Бу балаһыанньаны СӨ Бырабыыталыстыбата хонтуруолга ылла. Күн аайы, хас 3 чаас аайы ньиэп тохтуутун содулун туоратыы боппуруоһугар сүбэ мунньах ыытыллар.

Ньиэп тохтубут сиригэр «СӨ ОДьКХ» тэрилтэ күүһүнэн саахалы туоратар үлэлэр салҕаналлар. Ньиэп тохтуутун туоратыыга 7 тиэхиньикэ уонна 11 киһи үлэлии сылдьар. Ньиэп бородууктата тохтон киртитиллибит хаары ханна мунньар уонна салгыы хайдах суох гынар боппуруос быһаарыллар.

Министиэристибэ судаарыстыбаннай иниспиэктэрдэрэ ньиэп тохтубут сириттэн боруобалары ыллылар. Боруобалар чугастааҕы рейсинэн Дьокуускай куоракка «РИАЦЭМ» ГБУ-га лабораториятыгар чинчийиигэ ыытыллыахтара.

Быһылаан тахсыбыт сиригэр бүгүн Росприроднадзор үлэһиттэрэ көтөллөр, онтон сарсын Ростехнадзор үлэһиттэрэ тиийэллэрэ былааннанар.