Тиксиигэ волонтердар 23 туоннаттан тахса тимир тобоҕун хомуйдулар

«Ыраас Арктика» экологическай бырайыак волонтердара Тиксии бөһүөлэгин, Хотугу эргимтэ таһыгар турар Арассыыйа саамай хотугу пуордун хомуйуутун түмүктээтилэр.

Бу туһунан бырайыак пресс-сулууспатыгар иһитиннэрдилэр. «Ыраас Арктика» бырайыак чэрчитинэн ыраастаныы үлэтэ Тиксиигэ 2021 сылтан ыытыллар. Федеральнай волонтердар манна иккис төгүлүн кытталлар. Нэдиэлэ устата волонтердар23,5 туонна тимири, 25 туонна кытаанах хамунаалынай тобохтору хомуйбуттар, 4 гектартан тахса сири ыраастаабыттар. Быйыл 90 сааһын бэлиэтиир бөһүөлэги уонна пуорду ыраастааһыҥҥа волонтердар Москваттан, Москва, Новгородовскай уонна Ярославскай уобаластартан, ону таһынан Хабаровскай кыраайтан көтөн кэлбиттэр. Кинилэри кытта олохтоох дьон мустубуттар», — диэн пресс-сулууспаҕа кэпсээтилэр.

Арктикаҕа ыраастаныы үлэтигэр сүрүннээн тимир, эргэ буочукалар, эргэ тиэхиньикэ куорпустара, итиэннэ быраҕыллыбыт дьиэлэри көтүрүү кэнниттэн тутуу бөҕүн-саҕын хомуйдулар. Быйыл «Ыраас Арктика» бырайыак Саха сирин биэс нэһилиэнньэлээх пуунун хабар. Ааспыт үс сылга Саха сиригэр 850 туоннаттан тахса быраҕыллыбыт тимири хомуйан, 31 гектар иэннээх сири бэрээдэктээбиттэр.