Тиксииттэн Дьокуускайга сөмөлүөтүнэн 18 көлүүр табаны тиэйэн аҕаллылар

Дьокуускай аэропорда  Тиксии бөһүөлэгиттэн Ан-26 сөмөлүөтүнэн көтөн кэлбит 18 көлүүр табаны көрүстэ.

«Сыаналаах уонна тыыннаах таҕаһаһы сөмөлүөтүнэн аҕалалларыгар туруктарын табаһыттар кэтээн көрдүлэр. Кыыллар айаны үчүгэйдик аһартылар. Куттала суох буолууну хааччыйарга бары наадалаах нуормалар, ирдэбиллэр тутуһулуннулар», — диэн аэропорт пресс-сулууспатыгар иһитиннэрдилэр.

Дьокуускайга кулун тутар 18-20 күннэригэр Саха сирин 20 оройуоннарыттан, Арассыыйаттан, Кытайтан уонна Монголияттан дэлэгээттэр кыттыылаах Норуоттар икки ардыларынааҕы табаһыттар IV сийиэстэрэ ыытыллыаҕа. Киэҥ бырагырааманан быыстапкалар, дьаарбаҥкалар, күрэстэр, ооньуулар уонна да атын тэрээһиннэр ыытыллыахтара.

Саха сирин 14 оройуонун табаһыттара таба көлүүрүгэр, аркааны быраҕыыга, хайыһардьыт табанан күрэхтэһиитэ, эстиэпиэтэҕэ күрэхтэһиэхтэрэ. Сүрүн тэрээһиннэр киин куоракка Сайсары Күөлгэ кулун тутар 20 күнүгэр ыытыллыахтара.