Тимофей Григорьев сэминээрэ эргиччи туһалаах буолла

Улууска быйыл тэриллибит Уус Алданнааҕы социальнай кэлим киин (салайааччы Сергеев И.И.) оҕо төрүөҕүттэн сокуоннай сааһын ситиэр диэри үлэлэһэр элбэх өҥөнү оҥорор хайысхалаах.

Оттон ханна оҕо баар да, кинини иитии-үөрэтии, чөлүгэр түһэрии наукаҕа олоҕуран ыытыллыахтаах. Ол да иһин, бу үлэлэри тэрийэр отделениеларга педагог идэлээх дьон ылыллаллар. Кинилэр педагогическай тускулларга олоҕуран үлэлииллэр уонна аттестацияны Үөрэх министиэристибэтин иһинэн ааһаллар.

Алтынньы 3 күнүгэр бу Кэлим киин стационарнай отделениетын баазатыгар «Психолого-педагогический подход: формы, методы и приемы в повседневной работе» диэн оҕону, төрөппүтү кытары үлэлэһэр исписэлиистэргэ уонна үлэһиттэргэ аналлаах сэминээр буолла. Барыта 13 үлэһит хабылынна. Сэминээргэ педагогика, психология идэлэрин толору баһылаабыт, дириҥ билиилээх, улуустааҕы үөрэх управлениетын начаалынньыгын солбуйааччы Тимофей Афанасьевич Григорьев анаан-минээн ыҥырыллан кытынна. Кини бырактыычаскай психолог, кинезиологическай психолог, биисинэс-тириэньэр быһыытынан баай уопуттаах улууска соҕотох киһи. Өссө урукку Реабилитация киинэ боруобалыыр былаһаакка буолан үлэлииригэр наука салайааччынан үлэлээбит кэмнэрдээх этэ.

Сэминээр саҕаланыытыгар оҕону, дьиэ-кэргэни кытары үлэни тэрийэр отделениелар уонна профильнай блоктар (социальнай, мэдиссиинискэй, педагогическай, психологическай) салайааччылара бары үлэлэрин хайысхаларынан иһитиннэрии оҥордулар. Ол кэнниттэн Тимофей Афанасьевич икки наука төрүттэриттэн саҕалаан, бу тэрилтэ педагогтарыгар быһаччы сыһыаннаах үөрэхтээһиҥҥэ саҥардыы киирбит уларыйыылар, ирдэбиллэр, аттестацияны ааһыы туһунан билиһиннэрдэ. Ону таһынан оҕону, төрөппүтү кытары күннээҕи үлэни тэрийиигэ көмөлөөх улахан психологическай тренини оҥордо. Тренинг үлэһиттэр хамаанда буолан бииргэ үлэлээһиннэригэр наһаа наадалаах эбит. Ол курдук, ким туохха ордук дьоҕурдааҕа, ханнык көрүҥҥэ күүстээҕэ барыта ырылыччы көстөн таҕыста.

Хас биирдии кыттааччы бэйэтин личность быһыытынан билиитигэр, билиниитигэр, ону бэйэтин сайыннарарга хайдах туһанарыгар сүбэни иһиттэ уонна оҕону, кини төрөппүтүн кытары үлэтигэр олус туһалаах үлэ көрүҥнэрин, ньымаларын биллэ, иҥэриннэ, идэҕэ сүбэлэри ылла.

Маны таһынан үлэһиттэр стационарга олох араас ыарахан түгэннэригэр түбэспит, чугас дьонноруттан хомойбут, кэлэйбит оҕолор киирэллэринэн, ыарырҕатар уустук ыйытыктарыгар таһымнаах харданы ылан астыннылар. Онон бу сэминээр инники үлэҕэ сыалы-соругу чопчулаата, сөптөөх хайысхалары ыйда, педагогическай компетенциялары чуолкайдаата, күннэтэ буолар олох түгэннэригэр психологическай албастары сатаан туһанарга үөрэттэ. Рефлексияҕа бүгүҥҥү үлэ туһунан бары бэйэлэрин санааларын аһаҕастык эттилэр, инникитин даҕаны маннык сэминээрдэр ыытыллалларыгар баҕа санааларын биллэрдилэр уонна көрдөһүүнү ылынан сөбүлэспит, бириэмэтин анаабыт, үрдүк таһымнаах көмөнү оҥорбут Тимофей Афанасьевичка махтал маанытын анаатылар, үлэтигэр ситиһиини, этэҥҥэ буолууну, дьолу-соргуну баҕардылар.

Светлана БУРЦЕВА, уопсастыбаннай кэрэспэдьиэн