Тимофей Стручков греко-римскэй тустууга Арассыыйа Куубагар кыайда

Новосибирскай уобаласка кулгаахтарынан кэһиллиилээх күрэсчиттэр ортолоругар көҥүл уонна греко-римскэй тустууга Арассыыйа Куубага түмүктэннэ.

Саха сирин сүүмэрдэммит хамаандата биир кыһыл көмүс уонна үс боруонса мэтээли ылла. Бу туһунан Сүүмэрдэммит хамаандалары успуорка бэлэмнээһин өрөспүүбүлүкэтээҕи киинигэр иһитиннэрдилэр.

Күрэхтэһии түмүгүнэн, Тимофей Стручков 60 кг диэри ыйааһыҥҥа греко-римскэй тустууга кыһыл көмүс мэтээлинэн наҕараадаланна. Көҥүл тустууга Саха сирин хамаандата үс боруонсаны ылла. Мэтээллэри Кирилл Охлопков (57 кг), Будимир Трофимов (65 кг) уонна Арылхан Гаврильев (70 кг) ыллылар. Быйылгы Арассыыйа Куубагар сүүстэн тахса кыттааччы кытынна. Бу күрэхтэһии дойду сүүмэрдэммит хамаандатын састаабыгар сүүмэрдиир түһүлгэнэн буолар.