Тимур Петряков — хоһуун байыас, саҥа баһылык

Байыаннай дьайыыга, биһиги Сахабыт сириттэн элбэх ньургун уол, аҕа дойдуларын иннигэр иэстэрин толороллор, хорсуннук туруулаһаллар. Олортон биирдэстэрэ — младшай сержант, отделение хамандыыра, саха чаҕылхай уола Тимур Петряков буолар. Кини дьулуура, хорсун быһыыта, Ийэ дойдуга бэриниилээх буолуута — барыбытыгар холобур буолар.

Сүрэх баҕатынан, дууһа ыйыытынан

Тимур Петряков — Саха сирин бары эдэр ыччатын курдук, төрөөбүт төрүт үгэстэрин иҥэринэн улааппыта. Өймөкөөн улууһун Томторуттан төрүттээх Тимур оҕо сааһа Үчүгэй сэлиэнньэтигэр ааспыта. Туруу үлэһит дьонноох уол оҕо эрдэҕиттэн үлэҕэ эриллэн-мускуллан улааппыта. Үчүгэй орто оскуолатын ситиһиилээхтик бүтэрбитэ. Тимур Петряков ХИФУ икки институтун — Математика уонна информатика институтун уонна Үп-экэниэмикэ институтун — тэҥинэн ситиһиилээхтик бүтэрбитэ. Университеты бүтэрэн баран, Тимур оскуолаҕа математиканы үөрэппитэ, эдэр спортсменнары остуол тенниһин секциятыгар эрчийбитэ. Бу сылларга кини төрөөбүт дойдутун дьиҥнээх киэн туттуута буолбута, күрэхтэһиилэргэ наҕараадалары ылан, лиидэр хаачыстыбаларын көрдөрөн, ыччаты бэйэтин тула түмпүтэ. Кэлин Арассыыйатааҕы норуот хаһаайыстыбатын уонна судаарыстыбаннай сулууспатын академиятын («Судаарыстыбаннай уонна муниципальнай салалта») үөрэнэ сылдьыбыта. Өймөкөөн улууһунааҕы үп управлениетыгар, онтон Саха Өрөспүүбүлүкэтин үбүн министиэристибэтигэр, кэлин Счетнай балаатаҕа үлэлээбитэ.

Байыаннай дьайыы саҕаламмытыгар, доҕотторо, билэр дьоно онно баалларын билэ-көрө сылдьан, хайдах даҕаны туора турар сатамматын Тимур өйдөөбүтэ. Ийэ дойдутугар бэриниилээх, патриотттуу санаалаах буолан, кини дойду иннигэр иэһин толорорго дьулуспута. 2024 сыл от ыйыгар Тимур Оборуона министиэристибэтин кытта хантараак баттаһан, байыаннай дьайыыга дойдутун көмүскүү барбыта. Кини Радиоэлектроннай охсуһуу ротатын операторыттан мотострелковай подразделение отделениетын хамандыырыгар тиийэ үүммүтэ. Ураты хорсун быһыылары көрдөрөн «За боевые отличия» биэдэмистибэннэй наҕарааданан уонна «Участник специальной военной операции» мэтээлинэн бэлиэтэммитэ.

Умнуллубат түгэннэр

Саллаат олоҕо Тимурга улахан тургутуунан буолла. Бойобуой сырыыларын туһунан улаханнык кэпсии сатаабат, уол бэйэтэ да сэмэйэ бэрт, көҥүллэммэт даҕаны буоллаҕа. Ол эрээри, кылгастык да буоллар, кини маннык кэпсээтэ: «Бастакы бойобуой сорудахпар киирэрбэр, билбэт буоламмын, долгуйбат этим. Өй-санаа да өттүнэн бэлэмэ, байыаннай да дьыалаҕа үөрүйэҕэ суох буоламмын буолуо, куттаммат этим, дроннар сэриилэрин атыннык санаабытым. Кэнники бааһырыы ылан баран, дроннартан улаханнык сэрэнэр буолбутум. Биирдэ бойобуой сорудахха сырыттахпына, FPV дрон аттыбар эстибитэ, онно бааһыраммын биир ый Астраханскай уобаласка госпиталга сыппытым. Биир түгэни олох умунубаппын. Биирдэ эмиэ сорудахха сырыттахпына, бойобуой зарядтаах FPV дрон төбөм үрдүнэн көтөн кэлэн, үс миэтэрэ үрдүккэ дыыгыныы-дыыгыныы турбута, хата, мин дьолбор, сатаан булбатаҕа быһыылаах, онно долгуйбутум, арааһы бары санаабытым».

Байыаннай дьайыы байыаһын хас биирдии күнэ өлөр-тиллэр хапсыһыы ортотугар ааһара биллэр. Ол эрээри, уол хорсун санаата, кыайыыга эрэлэ, биир дойдулаахтарын өйөбүллэрэ кинини инникигэ кынаттыыр, халыҥ хаххалыыр, тимир куйахтыыр.

Тимур Петряков курдук буойуннар — Ийэ дойдуларын иннигэр иэстэрин толорор, олохторун да кэрэйбэккэ, хорсуннук-хоодуоттук инники кирбиигэ сылдьар дьиҥнээх патриоттар. Кинилэр хорсун быһыылара, дьулуурдара кэлэр көлүөнэҕэ холобур буолара саарбаҕа суох. Кинилэр баар буоланнар, биһиги дойдубут күүстээх, норуоппут түмсүүлээх диир кыахтаахпыт.

Буойун, баһылык

Фронт инники кирбиитигэр сылдьар Тимурга уонна кини курдук атын буойуннарга, тыыл өйөбүлэ олус суолталаах. Саха сирин дьоно-сэргэтэ, дьиэ кэргэттэрэ, волонтердара кинилэргэ куруук көмөлөһөллөр, итии таҥаһы, аһылыгы, тиэхиньикэни ыыталлар. Бу — аҥардас мал-сал эрэ буолбатах, бу — эрэл, Ийэ дойду күүһүн тыына. Маннык өйөбүл байыастарга кыргыһыы хонуутугар бөҕө санааны, кыайыыга эрэли саҕаллар. Тимур эмиэ дойдутун дьонун көмөлөрүн истиҥник ахтар.

Ааспыт Куоластааһын биир кэлим күнүгэр бигэ санаалаах уол нэһилиэгин баһылыгын быыбарыгар турбута. Тимур Петряков Өймөкөөн улууһун Үчүгэй национальнай нэһилиэгин олохтоохторун 44,09% куоластарын ылан, баһылыгынан талыллыбыта.

Ол туһунан саҥа талыллыбыт баһылык маннык кэпсиир: «Мин нэһилиэк баһылыгын быыбарыгар уоппускабар кэлэ сылдьаммын туруорунан барбытым. Биир дойдулаахтарым өйүөхтэрэ диэн, саарбахтааһына суох, эрэнэр этим. Дойдубар сылдьар кэммэр дьону кытта көрсөн кэпсэппитим, бииргэ үөрэммит оҕолорум, аймахтарым, чугас дьонум көмөлөспүттэрэ. Кыайбытым кэннэ, тута дойдум дьоно эҕэрдэлээбиттэрэ. Бакаа, хаһан төттөрү ыыталлара биллибэт. Дойдум дьоно кэтэһэллэр, сотору кэминэн тиийиэм диэн эрэнэ күүтэбин».

Тимур Петряков хамаандатын кытта биир санаанан үлэлээн, төрөөбүт дойдутун дьонун-сэргэтин олоҕун хаачыстыбатын тупсарыаҕын, төрүт үгэстэрин салгыаҕын уонна эдэр көлүөнэ сайдар саҕахтарын түстүөҕүн этэр. Бу — дьиҥнээх лиидэр, патриот тыла.

Байыас олоҕун суола дойду иннигэр иэһи толоруу, бэйэни харыстаммакка сулууспалааһын уонна төрөөбүт нэһилиэгэр бэриниилээхтик үлэлээһин буолар. Кини холобура биһиэхэ Ийэ дойдубут күүһэ — дьон дьулууруттан, бэриниититтэн уонна бэйэ-бэйэҕэ көмөлөһүүтүттэн, өйөбүлүттэн тутулуктааҕын санатар. Тимур Петряков курдук уолаттар баар буоланнар, биһиги кэлэр кэскилбитигэр, кыайыыга эрэллээхпит.