Тирэхтээх омуктар буолабыт

Оҕо иитиитигэр учууталы уонна оскуоланы кытта биир ситимҥэ үлэлиир төрөппүттэр элбээн эрэллэрэ үөрдэр. Онуоха холобур быһыытынан Дьокуускай куорат А.Г. уонна Н.К. Чиряевтар ааттарынан Национальнай гимназиятын III “а” кылааһа буолуон сөп.

Бу иллээх кылаас салайааччыта Наталья Михайловна Максимова, аҥаардас үөрэх бырагырааматынан эрэ үөрэнээччигэ тиэрдиинэн муҥурдаммакка, сүрүнэ, киһи быһыытынан толору ситэн-хотон, айар-тутар баҕалаах, сайдам-сайаҕас майгылаах, төрөөбүт дойдуга туһалаах үтүө дьон буола үүнэн тахсалларыгар сатабылын, сыратын уурар. Ол туһуттан төрөппүттэри бэйэтин тула түмэн, биир санаанан үлэлиир үтүө үгэһи олохтообута. Былырыын Санкт-Петербург куоракка сылдьан үҥкүүгэ күрэхтэһэн, дойдубут биир саамай баай историялаах, олус кыраһыабай куоратын көрбүттэрэ.

Быйыл атын дойду бастыҥнарын кытта куоталаһарга хоп курдук оҥостон, Казахстаҥҥа ыытыллар “Almaty Music Festival” норуоттар икки ардыларынааҕы бэстибээлгэ 22 оҕо уонна 12 төрөппүт буолан күрэхтэһэн, таарыччы Казахстан Өрөспүүбүүлүкэтин Астана уонна Алматы куораттарын көрөн-истэн кэллилэр. Маннык сырыыларга оҕолор элбэҕи билэллэр-көрөллөр, сайдаллар. Бу норуоттар икки ардыларынааҕы куонкуруска Турцияттан, Монголияттан, Казахстантан кыттааччы кэлбит. Арассыыйаттан бэрэстэбиитэллэр – сахалар уонна хакастар эбит. Биһиги дьоммут манна олус ситиһиилээхтик кыттан үҥкүүгэ да, ырыаҕа да иккиэннэригэр Гран-При үрдүк аатын ылары ситиспиттэр, аны бастаабыттарын иһин Дубайга күрэхтэһэ барар туоһу суругунан наҕараадаламмыттар!

Астанаҕа “Байтерек” диэн биир кэрэ, ураты көстүүлээх тутууну оҕолор олус сэргээбиттэр. Байтерегы Казахстан бастакы Бэрэсидьиэнэ Нурсултан Назарбаев Казахстан киин куората Алматыттан Астана буолбут бэлиэтигэр 2002 сыллаахха туттарбыт. Казахтар уонна сахалар уруулуу, биир төрүттээх-уустаах дьоммут. Онон тас да көрүҥмүт уонна тылларбыт да майгыннаһаллар. Байтерек сахалыы “баай тирэх” диэн буолар эбит. Тирэх мас диэн – тополь. Казахтарга Байтерек биһиги Аал Луук маспытыгар тэҥнээх, өрүү эдэр, тирэхтээх, баай мас диэн уонна баай, кыахтаах судаарыстыбаны бэлиэтиир. Оҕолор төһө да Сахаларын сириттэн ыраах барбыттарын иһин, “биһиги эмиэ баай историялаах, баай тирэхтээх омуктар буолабыт” диэн бэйэлэригэр олус эрэллээхтик уонна холкутук сананан сылдьыбыттар.

Алматы куоракка аквапаркаҕа сөтүөлээн, хайаҕа хайыһардаан, фуникулерунан хатааһылаан, океанариумҥа араас дьикти балыктары көрөн, оҕолор сүрдээҕин астыннылар.

Оҕолор уонна төрөппүттэр кылаас салайааччытыгар Н.М.Максимоваҕа, ансаамбылы бэлэмнээбит бары дьоҥҥо, оскуола салалтатыгар, дириэктэр В.С. Пермяковаҕа истиҥ махталларын биллэрэллэр.