Тоҕус киһи эчэйиилээх саахалынан холуобунай дьыала тэрилиннэ

Мииринэй улууһугар гаас салгыҥҥа төлө баран, саахал тахсыбытынан  холуобунай дьыала тэрилиннэ. Бу быһылааҥҥа тоҕус киһи эмсэҕэлээбит. Ол туһунан Саха сирин силиэстийэлиир кэмитиэтин пресс-сулууспата иһитиннэрэр.

Саахал бүгүн сарсыарда, муус устар 27 күнүгэр, Таас Үрэх сэлиэнньэтиттэн 6 км сиргэ баар гаас скважинатыгар өрөмүөн үлэтин кэмигэр буолбут. Билиҥҥи туругунан быһылааҥҥа араас эчэйии ылбыт дьон улуустааҕы киин балыыһаҕа эмтэнэллэр. Олортон 3 киһитэ интенсивнэй терапия балааталарыгар сытар. Атыттар стационарга быраастарга көрдөрө сылдьаллар.

Саха сирин Силиэстийэлиир кэмитиэтэ этэринэн, эмсэҕэлээбиттэр ахсааннара өссө чуолкайданар.

Билигин исписэлиистэр скважинаҕа буолбут быһылаан биричиинэтин  үөрэтэллэр.