Тоҕус оһуордаах түһүлгэ бэрт сэргэхтик, көдьүүстээхтик ыытылынна

Дьокуускайга икки күннээх тоҕус оһуордаах түһүлгэ бэрт сэргэхтик, көдьүүстээхтик ыытылынна. Уус-уран айымньы 9 араас көрүҥэ Сибиэрэп айар талаанын арылхайдык көрдөрдө, төрүт култуураны өрө тутааччылары сомоҕолоото. Сунтаар улууһун култууратын биир сүрүн тэрээһинигэр өрөспүүбүлүкэ  араас муннугуттан барыта 797 киһи, ол иһигэр 347 оҕо кыттыыны ылла.

Түһүлгэни түмүктүүр тэрээһиҥҥэ сунтаардар тумулук туттар киһибит бэлитиичэскэй, уопсастыбаннай диэйэтэл  Климент Иванов ыалдьыттаата, аан тылы арыйда, эҕэрдэтин эттэ. Кини Сэргэй Сибиэрэп олоҕун бэлиэ түгэннэрин ахтан-санаан ааста, олус элбэх чахчылары кэпсээтэ.

Сүдү киһи үбүлүөйдээх сылын  өрөспүүбүлүкэ таһымыгар бэлиэтиир туһугар Ил Дархан Айсен Николаев анал хамыыһыйаны тэрийэн турар. Хамыыһыйа салайааччыта, бырабыыталыстыба  бэрэссэдээтэлин солбуйааччы Сергей Местников: «Кыыл Уола саха норуотун дьолугар төрөөн-үөскээн ааспыт улуу киһи. Онон кини аатын үйэтитэр биһиги ытык иэспит», — диэн эттэ. 

Маннык үрдүк таһымнаах тэрээһини ыытыыга биһиги биир дойдулаахпыт, «Арктик Капитал»  тэрилтэ салайааччыта Матвей Евсеев генеральнай спонсорынан буолар. Кини быйылгы тэрээһиҥҥэ 2 мөл. 200 тыһ. солкуобайы үбүлээтэ. Аны эһиил түһүлгэ 5 сыллаах үбүлүөйүгэр 3 мөл.солк. туруоруом диэн мэктиэлээтэ. 9 көрүҥ ахсын кыайыылаахтар 20-лии, 30-туу, 50-нуу тыһ.солк.,  онтон да атын араас суумалаах уу харчынан наҕараадаланнылар.

Сунтаар улууһун баһылыга Анатолий Григорьев: «Тоҕус оһуордаах түһүлгэ Сибиэрэп 125 сылын бэлиэтиир тэрээһин үлэлэртэн биирдэстэрэ буолар. Инникитин да киэҥ далааһыннаах, былааннаах дьаһаллар, бырайыактар олоххо киириэхтэрэ. Ол чэрчитинэн, сынньалаҥ пааркабыт саҥардыллыаҕа, култуура эбийиэктэрэ тутуллуохтара, өрөмүөннэниэхтэрэ. Бу барыта биһиги сүдү киһибит Сэргэй Сибиэрэп дьоһуннаах өҥөтө буолар», — диэн бэлиэтээтэ.

«Тоҕус оһуордаах түһүлгэ» күрэҕэр саамай кыра уонна саамай аҕа кыттааччылары чиэстиир үтүө үгэс баар.

Быйылгы күрэххэ кырачаан кыттааччынан Дьокуускай куораттан «Чугдаар» ансаамбыл кэрэчээн кыыһа, 5 саастаах Анита Назарова, оттон саамай аҕа саастаах ытык кырдьаҕаһынан 87 саастаах оһуохайдьыт Прасковья Машкарова буолла.

Тоҕус оһуордаах түһүлгэ Дархан этээччитэ Михаил Евсеев -Кураһаай Мэхээлэ  125 тыһыынча солкуобайынан наҕараадаланна.

Оһуохай саамай элбэх кыттааччылаах уонна үгүс дьон сэҥээриитин ылар түһүлгэнэн буолар. Манна кырачаан оҕолортон аҕам саастаахтарга диэри оһуохайы оройуттан туппут дьон түөлбэлээтилэр.

Тоҕус оһуордаах түһүлгэ биир саамай чаҕылхай түгэнэ кылаан кыайыылааҕы быһаарыы. Манна 9 туона кыайыылаахтара сэрэбиэй быһыытынан дьоллоох билиэти тардан таһаараллар.

Сэрэбиэй түмүгүнэн кимнээх КЫЛААН КЫАЙЫЫЛААХ буоллулар?

-«Төрүт дорҕоон» түһүлгэ кыайыылааҕа Айаана Никитина (125.000 солк.);

-«Төрүт дорҕоон» кыайыылаахтара «Дьири дьир» ансаамбыл, «Айыы кыһата» оскуолатын үөрэнээччилэрэ  (200.000 солк.);

-«Тыл сүмэтэ» түһүлгэ кыайыылааҕа Мэҥэ Хаҥаластан Валерий Соловьев  (200.000 солк.);

— Оһуор үҥкүүтүн толоруутун муҥутуур кыайыылаахтара —  «УРАН» ХИФУ устудьуоннарын үҥкүү ансаамбыла  (400.000 солк.).

Бу курдук «Тоҕус оһуордаах түһүлгэ» үтүө түмүктээх, умнуллубат түгэннээх, чаҕылхай ситиһиилээх буолла.

Сунтаар улууһун дьаһалтатын пресс-сулууспата