Тоҕус томтордоох Чурапчыга туһалаах кэпсэтии таҕыста

Кулун тутар 4 күнүгэр, Чурапчы улууһугар Саха Өрөспүүбүлүкэтин култууратын, ускуустубатын уонна литературатын иккис күнүгэр сарсыарда Арчы дьиэтигэр ыалдьыттарга алгыс сиэрэ-туома оҥоһулунна.

Бу күн «Симэх» норуот ускуустубатын киинин быыстапката үөрүүлээх быһыыга-майгыга арылынна. Быыстапка арыллыытынан Чурапчы улууһун баһылыгын социальнай боппуруостарга солбуйааччы  Мария Кронникова, Чурапчы нэһилиэгин баһылыга Владимир Сивцев, Чурапчы улууһун култуураҕа управлениетын салайааччы Петр Гуляев, «Симэх» киин салайааччыта  Яна Игнатьева эҕэрдэлээтилэр. Кинилэр  Чурапчы улууһун маастардарын, түмсүү салайааччыларын кытары инники былааннары торумнаатылар.
Ону таһынан, «Утум» уус-уран оҥоһуктар дьиэлэригэр Саха Өрөспүүбүлүкэтин норуотун маастардара: туой оҥоһукка — Дмитрий Колодезников, мас оҥоһукка — Андрей Малышев, туос оҥоһукка — Татьяна Карамзина, муос оҥоһукка — Олег Соловьев, көмүс сабынан быысапкаҕа Галина  Ноговицына маастар-кылаастарыгар элбэх киһи сырытта.

Устуоруйа уонна этнография мусуойугар Ем. Ярославскай аатынан судаарыстыбаннай мусуой методиһа Анна Варламова сахалыы ымыыны оҥорорго, А.Макарова аатынан култуура уонна ускуустуба Саха сиринээҕи кэллиэһин преподавателлара үҥкүү кэлэктииптэрин хореографтарыгар үҥкүүнү туруорарга, Олоҥхо-тыйаатырын артыыстара олоҥхо тойуктарыгар маастар-кылаастары ыыттылар.

Күнүс 2 чаастан улуус дьаһалтатын мунньахтыыр саалатыгар СӨ судаарыстыбаннай сүбэһитэ, Геокултуурунай сайдыы институтун генеральнай дириэктэрэ Андрей Борисовы кытары «Төрүт үгэс -– мин үүнэр үктэлим» диэн көрсүһүү буолла. Көрсүһүүгэ улуус баһылыга Степан Саргыдаев, нэһилиэктэр баһылыктара, үөрэх, култуура уонна уопсастыбаннай тэрилтэлэр салайааччылара, үлэһиттэрэ кытыннылар. Андрей Саввич духуобунас, сиэр-майгы сыаннастарын харыстааһыҥҥа уонна сайыннарыыга​ аналлаах «ТҮМҮҮ — Төрүт үгэс мин үүнэр үктэлим» бырайыагы ​ сырдатта. Кулун тутар 30-31 күннэригэр Дьокуускайга ыытыллыбыт «ТҮМҮҮ» уопсастыбаннай мунньаҕар 1600 кэриҥэ киһи кыттыбытын, улуустартан, куораттартан 450 дэлэгээт кэлбитин туһунан иһитиннэрдэ. Мунньах түмүгүнэн, Ил Дархан Айсен Николаев сорудаҕынан СӨ бырабыыталыстыбатыгар духуобунас, сиэр-майгы сыаннастарын бөҕөргөтүүгэ аналлаах бырагыраама ылыллыахтаах.

Олоҥхо тыйаатырын дириэктэрэ Мария Турантаева Олоҥхо тыйаатыра саха норуотун үгэс буолбут сыаннастарын бөҕөргөтүүгэ оруолун туһунан кэпсээтэ.

Геокултуурунай сайдыы үнүстүүтүн үлэһиттэрэ — методист Саргылаана ​ Адамова Олоҥхо дьиэлэрин биир кэлим систиэмэтин оҥоруу, толорооччу дириэктэр Андрей Мартынов институт бырайыактарын туһунан билиһиннэрдилэр. Манна даҕатан эттэххэ, Олоҥхо дьиэлэрин биир кэлим систиэмэтин бырайыага 2027 сылга диэри оҥоһуллан бүтүөхтээх.
Ону таһынан Чакыр нэһилиэгин баһылыга Константин Лебедев, Хайахсыт нэһилиэгин баһылыга Тарас Тарасов нэһилиэктэригэр олорон ааспыт олоҥхоһуттары ахтан-санаан туран, олоҥхону тарҕатыыга, үөрэтиигэ тус санааларын үллэһиннилэр.

Олоҥхо дьиэтин дириэктэрэ Дмитрий Попов олоҥхо истиҥ эйгэтин үөскэтэр үлэни-хамнаһы билиһиннэрдэ.

Көрсүһүү түмүгүнэн Андрей Борисов:

«Чурапчы дьоно-сэргэтэ, баһылык Степан​ Саргыдаев​ бары түмүллэн, санааларын түмэн, ааспыт үбүлүөйдэргэ, билигин ыытылла турар тэрээһиннэргэ суолта ууран, биһигини ыҥыран, туһалаах кэпсэтии тахсыбытыттан астынныбыт. Тоҕус томтордоох Чурапчылар ырааҕы-киэҥи көрөр эбиккит. Биһиги Чурапчы улууһун Олоҥхо киинин салайааччыта Дмитрий Поповы кытары «Куруубай хааннаах Кулун Куллустуур​» олоҥхону туруоран, Дьокуускайга билигин тутулла турар Арктика киинигэр көрдөрөр туһунан кэпсэппиппит. Эрдэттэн  култуура күүһүн-уоҕун түмэн, баар кыахтары туһанан испэктээги туруоруохха наада. Биһиги өттүбүтүттэн Олоҥхо тыйаатыра көмөлөһүөҕэ», — диэн эттэ.

Киэһэ «Айылгы» кииҥҥэ Степанида Борисова туруоруутугар «Кыыс Дэбилийэ» испэктээк-олоҥхо көрдөрүлүннэ. Испэктээк буолуон иннинэ улуус баһылыга Степан Саргыдаев уонна култуура управлениетын начаалынньыга Петр Гуляев Чурапчы улууһуттан төрүттээх, Олоҥхо тыйаатырыгар ситиһиилээхтик үлэлии-хамсыы сылдьар киэн туттар талааннаах ыччаттарыгар Анастасия Алексееваҕа, Наталья Корякинаҕа уонна Дмитрий Хоютановка Махтал суруктары,тустаах  наҕараадалары туттарда.