Тохсунньу 21-23 күннэригэр үөрэх үлэһиттэрин тохсунньутааҕы мунньаҕа буолар

Тохсунньу 21-23 күннэригэр Саха сирин үөрэҕин үлэһиттэрин тохсунньутааҕы мунньаҕа буолуоҕа. Биир былаһааккаҕа Саха сирин үөрэҕин инникитин сэҥээрэр салайааччылартан уонна педагогтартан саҕалаан төрөппүттэргэ, устудьуоннарга, педагогическай үлэ бэтэрээннэригэр, оскуола үөрэнээччилэригэр тиийэ бары кыттыахтара.

Быйылгы мунньах тиэмэтинэн “Саха сирин үөрэҕин каадырын экосистиэмэтэ: бииргэ тэрийэбит” буолар.

Педагогическай каадыры бэлэмнээһин, оскуола оҕолорун учуутал идэтигэр үөрэтиигэ эрдэттэн туһаайар үлэни ыытыы, педагогтар маастарыстыбаларын идэҕэ таһымнарын үрдэтии уонна оскуолаларга сытыытык турар педагогическай каадыр тиийбэт кыһалҕатын быһаарар суолларын ырытыһыахтара.

“Үөрэх үлэһиттэрин тохсунньутааҕы мунньаҕын иитинэн сүрүн бырагыраамаҕа барыта 60-тан тахса тэрээһин былааннанар. Быйылгы тэрээһин уратытынан инникитин учуутал буолуохтаах көлүөнэни кытта көхтөөх кэпсэтии” – диэн тэрийээччилэр иһитиннэрэллэр.

Мунньах 2025 сыллааҕы Үөрэх уонна билим министиэристибэтин үлэтин түмүгүн таһаарыыттан уонна үүммүт сылга соруктары туруорууттан саҕаланыаҕа, отчуот тохсунньу 21 күнүгэр былааннанар. Сүрүн тэрээһиннэр хас да былаһаакканан тохсунньу 22 күнүгэр Үлэ кыбаарталыгар буолуохтара. Тохсунньу 23 күнүгэр ыччакка аналаах хас даҕаны тэрээһин ыытыллыаҕа. Онтон биирдэстэринэн педагогическай-психологическай кылаас оҕолоругар аналлаах кылгас үөрэх буолар. Ону тэҥэ, кынат-тэрээһиннэр былааннаналлар. Үөрэх үлэһиттэрин тохсунньутааҕы мунньаҕын толору бырагырааматын манна көрүҥ.