Тохсунньу 27 күнүгэр Дьокуускай киинигэр «Блокада килиэбэ» аахсыйа ыытыллыаҕа

 Тохсунньу 27 күнүгэр Ленинграды блокадаттан толору босхолооһун күнэ бэлиэтэнэр. Ленинград блокадатын сиэртибэлэрин кэриэстээн, бу күн дойду үрдүнэн «Блокада килиэбэ» аахсыйа ыытыллар.

Дьокуускайга аахсыйанан хас даҕаны былаһааккаҕа тэриллиэҕэ. Аахсыйаны «Кыайыы волонтердара» Бүтүн Арассыыйатааҕы уопсастыбаннай хамсааһын тэрийэр. Дьокуускайга «Блокада килиэбэ» аахсыйа тохсунньу 27 күнүгэр 13:00 чаастан 17:00 чааска диэри сүрүн былаһааккаларга ыытыллыаҕа: «Туймаада» атыы-эргиэн, аралдьытар киинигэр, «Сахаэкспоцентр» атыы-быыстапка киинигэр, «Проспект» атыы киинигэр.

Ленинград блокадата уһуллубутун 82-с сылыгар волонтердар, элбэх сыллаах үтүө үгэс быһыытынан «Дьокуускайдааҕы килиэп кэмбинээтэ» хампаанньа бэлэмнээбит килиэбин  түҥэтиэхтэрэ. Килиэби кытта аахсыйа кыттыылаахтара волонтердартан иһитиннэрэр кумааҕыны тутуохтара. Ону таһынан бу күн оскуолаларга уонна атын үөрэх тэрилтэлэригэр үгэс буолбут «Блокада килиэбэ» кэриэстэбил уруоктара ыытыллыахтара.

Санаттахха, 125 граммнаах кыра килиэп – блокада саамай ыар кэмигэр, 1941 сыл сэтинньи 20 күнүттэн ахсынньы 25 күнүгэр диэри, түҥэтиллэр саамай кыра нуорма этэ.