Тохсунньу бастакы күннэригэр тимир көлө сыаната биллэрдик үрдээбитэ бэлиэтэннэ

Тохсунньу бастакы нэдиэлэлэригэр саҥа тимир көлө сыаналара ортотунан 1,5–3% үрдээтэ. Сыана үрдээһинэ НДС уонна утилизационнай хомуур ыстаапкалара үрдээбиттэрин кытта сибээстээх. Бу туһунан дилердэр иһитиннэрэллэр.

«2026 сыл тохсунньутуттан саҥа чэпчэки массыыналар сыаналара ортотунан 1,5–3% үрдээтэ. Арассыыйа бреннэрэ — Lada, Solaris, Tenet, Xcite, „Москвич“ уонна Evolute, ону таһынан кытай бреннэрэ — Haval, Tank, Geely, Chery, Exlantix, Omoda, Jaecoo, Changan, GAC, BAIC, Bestune уонна LiXiang моделларыгар сыана үрдээтэ», — диэн  дилердэр «Коммерсантъ» хаһыакка иһитиннэрдилэр. Кинилэр үгүс мааркаҕа сыана 50-100 тыһыынча солкуобайынан, оттон премиум-кылааска 300 тыһыынчаҕа диэри үрдээбитин бэлиэтииллэр.

Бастакы кыбаарталга сыана өссө 5–10% үрдүөҕэ, онуоха чэпчэтиилэр былырыыҥҥыттан аҕыйах буолуохтара диэн күүтэллэр. Урут «АВТОСТАТ» уонна РОАД эспиэрдэрэ 2026 сылга Арассыыйаҕа саҥа массыыналар сыаналара ортотунан 10–15%, оттон тастан киирэр массыыналар 50% диэри ыарыахтарын сэрэппиттэрэ. Сүрүн төрүөттэринэн сыл бастакы аҥаарыгар сыана түһүмэхтэринэн үрдээһинэ, НДС үрдээһинэ уонна утилизационнай хомуур ыстаапкаларын эмискэ үрдээһинэ буолар, ордук 160 ат күүстээх массыыналарга хомуур 1-3 мөл. солкуобайга диэри улаатар. Итиннэ олоҕуран, аналитиктар ырыынак өссө кыччыаҕын сабаҕалаабыттара.