Тохсунньу бүтүүтэ халлаан сылыйыаҕын билгэлииллэр

Тиихэй акыйаантан сылаас салгын салгыы кэлэн, Саха сирин киин, илин өттүн сылытыаҕа. Нэдиэлэтээҕи күн-дьыл туругун ЯСИАҕа Гидрометео сулууспа метеорологияҕа уонна агрометеорологическй сабаҕалааһыҥҥа салаатын начаалынньыга Саргылана Никитина билиһиннэрбит.  

“Дьокуускайга халлаан нуорматтан 2-8 кыраадыһынан сылаас, бу курдук тохсунньу бүтүөр диэри туруоҕа. Бэҕэһээ күнүс Аллараа Халыма улууһугар, Черскэйгэ +3 кыраадыска тиийэ сылыйда. Бу саамай сылаас көрдөрүү. Дьокуускайга уонна киин улуустарга нэдиэлэ бүтүөр диэри түүнүн – 34…-36, күнүһүн -28…-31 кыраадыска диэри буолуоҕа” – диэн Саргылана Никитина иһитиннэрбит.

Бу туһунан ЯСИА суруйар.