Тохсунньутааҕы  «ЧОЛБОН»

ДРАМАТУРГ СТЕПАН ЕФРЕМОВ, ЛИТЕРАТУРОВЕД ГАВРИЛ БОЕСКОРОВ, ПОЭТ ИВАН ГОГОЛЕВ УОННА ХАБЫР 90-С СЫЛЛАР БЭЛИЭ ДЬОННОРО.

Айар тыл аҕата Өксөкүлээх Өлөксөй «Байанай алгыһа» айымньыта суруллубут сылыттан ааҕыллар саха суругунан литературатын биир бэлиэ кэрдииһигэр анаммыт дьылы саҕалыыр бастакы нүөмэрин умсугуйан ааҕарга ыҥырабыт:

— Саха суругунан литературатын төрүттэммитэ 125 сылынан сурунаалбыт бас эрэдээктэрэ, Саха сирин суруйааччыларын сойууһун бэрэссэдээтэлэ Гаврил Андросов санааларын туймуулара тахсыахтара. Бу тиһик саха литературатын төрдүн-төбөтүн ыраҥалыыр «Алгыстан айыллыбыт, олоҥхоттон оҥоһуллубут» суруйуута;

— Улуу Кыайыы 80 сылынан «Улуу Кыайыы айымньылара» рубрикаҕа аныгы кэм бастыҥ прозаиктарын үлэлэрин таһаарыахпыт. Бу рубриканы норуот суруйааччыта Баһылай Харысхал итэҕэл уонна эрэл өйдөбүллэрин туһунан киһи кутун кылын таарыйар «Кэҕэ этиттэриитэ» кэпсээнинэн саҕалыыбыт;

— Константин Эверстов «Сэргэлээххэ сэргэх күннэр» сэһэнин салгыытыгар Михаил Николаев, Уйбаан Самаайап, Александр Жураковскай курдук бэлиэ дьон туһунан кэрэхсээҥ;

— култуура уонна искусство колледжын дириэктэрэ, режиссер Захар Никитин прозаҕа холонуута – оҕо саас умнуллубат өйдөбүллэрин туһунан «Кандидат хараҕа» уонна «Эһэм тииһэ» кэпсээннэр;

— саха норуотун поэта Иван Гоголев–Кындыл төрөөбүтэ 95 сылынан талыллыбыт хоһооннорун бөлөҕө;

— «Полярная звезда» сурунаал бас эрэдээктэрэ, тылбаасчыт, публицист Владислав Доллонов поэзияҕа холонуута – «Күннээҕи сүпсүлгэн чочумча тохтоотун…» хоһооннорун бөлөҕө;

— Чурапчыга олорор Саха Өрөспүүбүлүкэтин суруйааччыларын сойууһун чилиэнэ Римма Корякина-Хотууна «Үүммүт үйэни сиэлиттэн муоһалаан…» диэн олох уонна таптал туһунан хоһооннорун бөлөҕө;

— Тааттаҕа олорор суруйааччы Бүөтүр Хара аныгы олох омсолоох өрүттэрин үгэргиир «Тураах доҕотторо» комедията;

— Томмот куоракка олорор нуучча суруйааччыта Елена Овчарова Саҥа дьыл сүпсүгүн уонна киһи уйулҕатын туймууларын алтыһыннарар «Харыйа» кэпсээнэ Анастасия Еремеева тылбааһыгар;

— саха суругунан литературата төрүттэммитэ 125 сылыгар анаммыт «Олоҥхо дойдутун айар түмсүүлэрэ» диэн саҥа рубриканы Сунтаар улууһун «Ньургуһуннар» айар түмсүүтүнэн арыйабыт;

— Бүтүн Россиятааҕы В.К. Арсеньев аатынан «Уһук Илин» бириэмийэ лауреата Анатолий Слепцов «Суоппар убайдарым тыырбыт суолларынан» эссетэ;

— сурунаал саҥа бырайыага – «Биллиилээх суруйааччылар биографиялара» рубрикаҕа «Степан Ефремов. Чуумпу кытылга дьулуһуу драмата» Рустам Каженкин суруйуутугар номоххо киирбит «Ини-бии» айымньы ааптарын уустук дьылҕата;

— Күлүмнүүр аатынан суруналыыстыка сударыыстыбаннай бириэмийэ лауреата Василий Никифоров таайын, саха литератураҕа нэһилиэстибэтин көмүскүүргэ толук уурбут саха хоһуун учуонайын туһунан «Гаврил Боескоров. Саха литературатын “охсуһуулаах” хонуутугар» ыстатыйата;

— «Оҕоҕун кытта аах» рубрикаҕа Баал Хабырыыс оскуола оҕолоругар аналлаах хоһоонноро.

Күн – сири, «Чолбон» – саханы сырдатар.

Алгыһы кытта «Чолбон» сурунаал