Тохсус «Чолбон»: авар, эбээн уонна саха суруйааччылара

Литературабыт сайдарыгар, киэҥник тарҕанарыгар соруктаахтык үлэлиир «Чолбон» сурунаал балаҕан ыйынааҕы нүөмэрэ атыыга таҕыста. Саҥа нүөмэргэ ааҕыҥ:

— Сэмэн Маайыһап «Дьолго дьулуһар буоллахха…» романыгар аныгы тыа сирин кыра да, улахан да кыһалҕаларын, геройдар күһүҥҥү түбүктэрин;

— “Омук омукка сыһыана оҕо дьулайыныы уйан, чараас буоларын өйдүүбүт” диэн суруйар Айысхаана «Тохсус балаатаҕа» кэпсээнигэр. Бу айымньыны  сэргэ суруйааччы Аҕа дойду Улуу сэриитин кэннинээҕи саха дьахтарын ыар дьылҕатын ойуулуур «Ылдьаана» кэпсээнин уонна«Муоралыын кэпсэтии», «Ырыа төрөөбүт кытылыгар» диэн саҥа этюдтарын;

— Норуот поэта Наталья Харлампьева «Көтөн күпсүй үрдүккэ…» саҥа хоһооннорун бөлөҕүн;

— эбээн поэта, учуонайа, педагога, уопсастыбаннай деятель, филология наукатын кандидата Варвара Белолюбская–Аркук 75 сааһын көрсө хоһооннорун сахалыы билиһиннэриини;

— икки көлүөнэ уостан түспэт ырыаларын айбыт поэттар Сэмэн Капитонов «Ньургуһун санаалар» уонна Яна Байгожаева «Өрүү устабын эн диэки…» саҥа хоһооннорун бөлөҕүн;

— быйыл ХХ үйэ улуу поэтынан ааттаммыт авар суруйааччыта, Социалистыы Үлэ геройа Расул Гамзатов төрөөбүтэ 100 сылын туолла. Кини«Дагестан сулустара» хоһооннорун доҕоро, саха норуодунай поэта Сэмэн Данилов тылбааһын;

— суруйааччылар куорат устун айаннара кытары ураты буолар эбит. «Проспектан Сэргэлээххэ диэри» диэн Сэмэн Даниловтыын айанын туһунан үөлээннээҕэ Михаил Тимофеев ахтыытын;

— Саха тыйаатырдыы искусствотын кэскилин кимнээх ындыылана сылдьалларын туһунан «Билсиҥ – алтыс көлүөнэ щепкиннэр!» кэпсэтиитин;

— Сунтаар кыраайы үөрэтээччитэ Альбина Иванова «Таас Ыстапаан» диэн Гражданскай сэрии будулҕаныгар оҕустаран суорума суолламмыт киһи киэнэ аҕыс кырыылааҕын туһунан чинчийиитин;

— Эдэр сааһыгар суох буолбут кириитик Николай Рыкунов Николай Лугинов «Чыҥыс-Хаан ыйааҕынан» трилогиятыгар бэлиэтээһиннэрин уонна кириитик Ольга Макарова «Кыларыйар кылаан кырдьыктаах» диэн Наталья Харлампьева «Тыаллыын кэпсэтии» кинигэтин ырытыытын;

— Кыраттан да барыс таһаарынаары сөбө суохтук быһыыланарбыт хайдах туолуйан тахсыан сөбүн туһунан «Коррупция сүлүһүнэ хас биирдиибитигэр…» диэн баан үрдүкү кэрдиистээх үлэһитэ Афанасий Лугинов быһаарыытын;

— Үгүс сүһүөх саха тылын учууталларын уһуйааччы, кириитик В.Н. Протодьяконов кэриэһигэр уус-уран литература кириитикэтигэр сабыылаах күрэс торумун.

Сурунаалбытын Орджоникидзе уулуссатын 31№-тэн, Бэчээт Дьиэтиттэн, Paparazzi хаартыска салонуттан уонна 125-с хостон ылыаххытын сөп.