Тохтобулга сытар үрүксээги уоран, 300 чаас булгуччулаах үлэҕэ тардылынна

Дьокуускайдааҕы куорат суута уорууга (РФ Холуобунай кодексатын 158-с ыстатыйатын 2-с чааһын «в» пууна) буруйданар киһи холуобунай дьыалатын көрдө.

Суут быһаарбытынан, бу сыл балаҕан ыйын 26 күнүгэр киэһэ хойут Бороҕон сэлиэнньэтиттэн төрүттээх, Дьокуускайга олорор 1984 с.т. эр киһи «1 №-дээх поликлиника» сылаас тохтобулугар ыскамыайкаҕа сытар үрүксээги уорбут.

3000 солкуобайдаах хара өҥнөөх үрүксээк иһигэр 1000 солк. суумалаах иитэр тэрил уонна хас биирэ 2000 солк. суумалаах икки шортик баар эбит. Онон, эмсэҕэлээччигэ уопсайа 8000 солкуобай суумалаах матырыйаалынай хоромньу оҥоһуллубут.

Сууттанааччы уоруллубут маллары бэйэтин көрүүтүнэн туһаммыт. Суут мунньаҕар сууттанааччы буруйун толору билиммит. Кини буруйа эмсэҕэлээччи уонна туоһу көрдөрүүлэринэн, силиэстийэ боротокуолларынан дакаастаммыт. Суут буруйдаахха 300 чаас булгуччулаах үлэни аныырга уураах таһаарда. Үлэ миэстэтин олохтоох салайыныы уорганнара холуобунай-толоруу иниспиэксийэтин сөбүлэҥинэн быһаарыахтара. Суут уурааҕа сокуоннай күүһүгэр киирэ илик, диэн СӨ Сууттарын холбоһуктаах пресс-сулууспата суруйар.