Тохтобулларга табахтыыры бобуохтара

Госдуумаҕа дьокутааттар уопсастыбаннай тырааныспар тохтобулларыгар табаҕы тардыыны уонна никотиннаах бородууксуйаны туһаныыны бобор туһунан этии киллэрдилэр. Сокуон барылын Госдуумаҕа ЛДПР баартыйа салайааччыта Леонид Слуцкай салайааччылаах дьокутааттар бөлөхтөрө киллэрбиттэрин туһунан РИА Новости иһитиннэрэр.

«Табаҕы тардары бобуу уопсастыбаннай тырааныспар тохтобулларыгар уонна кинилэр турар сирдэриттэн биэс миэтэрэ тэйиччи, ону тэҥэ, элбэх кыбартыыралаах олорор дьиэлэргэ баар маҕаһыыннар уонна араас тэрилтэлэр киирэр-тахсар ааннарыгар дьайыаҕа», — диэн сокуон барылын быһаарыытыгар этиллэр.

Билигин метро ыстаансыйаларыгар, тимир суол вокзалларыгар, автовокзалларга уонна аэропортарга табаҕы тардыы сокуонунан бобуллар.
Сокуон ылылыннаҕына, табах буруотуттан эмсэҕэлиир гражданнар интэриэстэрэ учуоттаныаҕа уонна кинилэргэ  ордук табыгастаах усулуобуйа үөскүөҕэ диэн бэлиэтэнэр.

“Гражданнар доруобуйаларын табах буруотун дьайыытыттан, никотиннаах бородууксуйаны туһаныы содулларыттан харыстыыр ​​туһунан” сокуон 12-с ыстатыйатыгар уларытыылары киллэриэхтэрэ.