Тойбохой ансаамбылларын ситиһиилэринэн киэн тутуннубут

«Кыһын Саха сириттэн саҕаланар» өрөспүүбүлүкэтээҕи бэстибээл чэрчитинэн, “Северная звезда” талааннары көрдөөһүн бастакы түһүмэҕэ олунньу ый 18 күнүгэр биһиги Тойбохойбутугар буолан ааста.

«GLOBAL NORTH STAR» продюсерскай киин, СӨ култуураҕа уонна духуобунай сайдыыга министиэристибэтин иһинэн геокультурнай сайдыы институтун, “Юные якутяне” өрөспүүбүлүкэтээҕи ресурснай киин уонна “VIVA TOUR» туроператор тэрийиилэринэн ыытыллар бэстибээл үрдүк таһымнааҕын көрүү-күрэс дьүүллүүр сүбэтин салайааччыларын ааттара-суоллара, үлэлэрэ-хамнастара да туоһулуур.

Ол курдук, хореография, муода, цииркэ ускуустубатын хайысхатыгар дьүүллүүр сүбэ салайааччыта,  үрдүк категориялаах хореограф-педагог, үрдүк категориялаах балет артыыһа, Москва уонна Санкт-Петербург куораттарга хореограф-преподавателлэр таһымнарын үрдэтэр куурустар сүрүннүүр исписэлиистэрэ, норуоттар икки ардыларынааҕы элбэх бэстибээл уонна куонкурус дьүүллүүр сүбэлэригэр үлэлээбит, элбэх маастар-кылаастары тэрийэн ыыппыт Литвинов Андрей Анатольевич; Саха Өрөспүүбүлүкэтин култууратын туйгуна, “Айыы сыдьаайа” оҕо вокальнай ансаамбылын уус-уран салайааччыта Алексеева Александра Борисовна уонна фольклор, национальнай инструментальнай муусука, уус-уран тыл маастара,  Саха Өрөспүүбүлүкэтин үөрэҕириитин туйгуна, импровизатор-хомусчут, Олоҥхо ыһыаҕын Гран-притын хаһаайката Слепцова Марианна Михайловна үлэлээбиттэрэ элбэҕи этэр.
Маннык улахан таһымнаах тэрээһин саҕаланар түһүмэҕэр Клара Степановна уонна Александр Васильевич Тихоновтар ааттарынан Култуурабыт киинин иһинэн үлэлиир,  Саха Өрөспүүбүлүкэтин култууратын туйгуна, хореограф Мария Николаевна Семенова салайааччылаах “Ситим” үҥкүү ансаамбыла Сергей Зверев «Оһуор» үҥкүүтүнэн  Гран-при, күрэс муҥутуур кыайыылааҕын үрдүк аатын сүктүлэр. Онтон «Далбар» үҥкүү ансаамбыла нуучча норуотун «Матушка Земля» үҥкүүтүнэн уонна Иван Степанович Иванов салайар “Дуораан” ырыа ансаамбыла “Дьулуруйар Ньургун Боотур” операттан түмүк ырыатын үрдүк таһымнаахтык толорон, I-кы истиэпэннээх лауреат үрдүк аатын ыланнар үөрүүлэрэ муҥура суох.
Маны сэргэ,  дьүүллүүр сүбэ биһиги нэһилиэкпит инструментальнай ансаамбылын уонна «Дуораан» ырыа ансаамбылын салайааччытыгар Иван Степанович Ивановка «Бастыҥ салайааччы» анал ааты иҥэрдэ.
Ити курдук, үрдүк таһымнаах күрэс бастакы түһүмэҕэр кыайыыны ситиспит айар куттаах кэлэктииптэрбитигэр ситиһиилэр өссө да кэлэ туралларыгар баҕарабыт. Араас таһымнаах күрэстэргэ кыайыы көтөллөнөн, дьоннорун-сэргэлэрин үөрдэ-көтүтэ, дойдуларын аатын дорҕоонноохтук ааттата сылдьыахтара диэн эрэнэбит.

Валерий ИЛЛАРИОНОВ, Тойбохой

Хаартыскалар: ааптар тиксэриилэрэ