Хаартыска: ааптар тиксэриитэ
Клара Степановна уонна Александр Васильевич Тихоновтар ааттарынан Тойбохойдооҕу «Кыталык» Култуура киинин иһинэн үлэлиир, сааһыра баран көмүс күһүҥҥү саастарыгар сылдьар саха далбардара түмсүбүт “Далбар” үҥкүү ансаамбыла ахсынньы 2-9 күннэригэр дойдубут тэбэр сүрэҕэр Москва куоракка «Танцевальный трофей России» федеральнай таһымнаах бэстибээл-күрэскэ кыттан кэллэ.
Хореограф, СӨ култууратын туйгуна Мария Николаевна Семенова салайааччылаах түмсүү «Ыаҕыйалаах үҥкүү” уонна “Танцевальное признание России” бэстибээл-күрэскэ “Айылҕалыын алтыһыы” үҥкүүлэринэн кытынна. Саха мааны далбардара иккиэннэригэр “Бастакы истиэпэннээх лауреат” үрдүк аатын сүгэн, дипломунан, мэтээллэринэн, кубогынан наҕараадаланнылар.
Ону сэргэ, үс үҥкүүһүт төрөөбүт күнэ Москваҕа сырыттаҕына сөп түбэспитинэн, бэлиэ күннэрин эрэстэрээҥҥэ атааран, сүргэлэрэ көтөҕүллэн, атахтара сири билбэт буола үөрэн-көтөн дойдуларыгар этэҥҥэ эргиллэн кэллилэр.
Москваҕа саҥа барбыт дьону «Внуково» аэропортан Измайловскай оройуон «Гамма» гостиницатыгар диэри оптуобуһунан босхо таһааран биэрбиттэригэр СӨ Тыатын хаһаайыстыбатын министиэристибэтин Москва куоракка бэрэстэбиитэлэ, бэйэбит уолбут Иван Александрович Поповка, Саха сирин бастайааннай бэрэстэбиитэлистибэтин салайааччытыгар Андрей Сандаминович Федотовка, быһаччы үлэлэспит Мария Николаевна Сафоноваҕа ансаамбыл кыттыылаахтара барҕа махтал тылларын этэллэр.
Онус сылын дьарыктанар “Далбар” үҥкүү ансаамбылын кыттыылаахтарын инники былааннара өссө да киэҥ. Утумнаахтык дьарыктанан, инникитин өссө да үрдүк таһымҥа тахсан, нэһилиэктэрин аатын дорҕоонноохтук ааттатан, саҥаттан саҥа үрдэллэри дабайарга баҕа санаалара муҥура суох.
Онно кинилэргэ куорсун анньааччыннан салайааччылара Мария Николаевна олохтоохтук ылсан, нэдиэлэҕэ иккитэ кулуупка күүскэ дьарыктаталыыра уонна көтүппэккэ сылдьалларын ирдиирэ төһүү буолар. Мария Николаевна тугу эттэ да, ансаамбыл кыттыылаахтара барытын үөрэ-көтө толорорго түбүгүрэллэр. Үҥкүүлэрин таҥаһын ансаамбыл кыттыылааҕа Мария Николаевна Иванова оҥорон биэрбит эскиһинэн, Светлана Ивановна Контогорова салалтатынан бэйэлэрэ тиктэллэр. Кинилэргэ кырдьар сааһы кыйдаан, куруук дьону-сэргэни кытта тэҥҥэ үөрэ-көтө сылдьарга, сааһырдым диэн сууланан кэбиспэккэ, үҥкүүлээн, ыллаан-туойан сылдьарга үтүө холобур буола сылдьар дьүөгэлэринэн 80-чатыгар чугаһаан эрэр Дора Кирилловна Васильева буолар. Кини төһө да сааһырдар, кэлэктиип биир тутаах киһитин быһыытынан нэһилиэнньэҕэ да, кэлэктиипкэ да чаҕылхай холобур, үтүө сүбэһит быһыытынан билинэллэр.
«Далбар» ансаамбыл кыттыыта суох нэһилиэк да, улуус да тэрээһинэ буолбат. Ыҥырдахтарына кэлэктиип тырааныспар көрдөһөн булан, үөрэ-көтө кыттан иһэр. Онно аккаастаабакка сөбүлэһэн киллэрэр-таһаарар суоппардарга кэлэктиип махтала эмиэ муҥура суох.
Ансаамбыл өрөспүүбүлүкэ иһигэр буолар күрэхтэһиилэргэ көхтөөхтүк кыттар уонна сылтан сыл таһымнара үрдээн, ситиһиилэрин чиҥэтэн биэрэн, лауреат, дипломант үрдүк аатыгар тиксиилэрэ элбээн иһэр.
Нэһилиэкпит киэн туттар «Далбар» үҥкүү ансаамбылын кыттыылаахтара салайааччыгыт Мария Николаевна салалтатынан кырдьар диэни билиммэккэ, куруук үөрэ-көтө үҥкүүлээн битийэн, дьоҥҥут-сэргэҕит ортотугар күлэ-үөрэ, кыайыы көтөллөнө, ситиһии эҥэрдэнэ сылдьаргытыгар баҕарабыт.
Валерий ИЛЛАРИОНОВ
Бүгүн, ыам ыйын 21 күнүгэр, өрөспүүбүлүкэ арҕаа, соҕуруулуу-арҕаа, соҕуруу улуустарыгар сөҥүүлээх, сөкүүндэҕэ 15-20 миэтэрэ түргэннээх…
Гражданскай оборуона дьыалаларыгар уонна нэһилиэнньэ олоҕор куттала суох буолуутун хааччыйыы миниистирин собуйааччы Яна Наумова киэһээҥҥи…
Күннээҕи олоҕу кытта тэҥҥэ хардыылыыр дьон түөкүттэр бааллар эбит. Аны оскуоланы бүтэрээри сылдьар оҕолорго үрдүк…
Ырыа күнүгэр аналлаах кэнсиэртэр оптуорунньукка, ыам ыйын 21 күнүгэр, Саха сирин бары куораттарыгар уонна сэлиэнньэлэригэр…
СӨ Ил Дархана Айсен Николаев Нам улууһугар оробуочай сырыытын чэрчитинэн, Хатырык олохтоохторун кытары көрсүһүү тэрийэн…
Өлүөхүмэ, Нам улуустарыгар халаан уутун содулун көрөн, киһи долгуйар, хараастар. Онон дьон-сэргэ уталыппакка эмсэҕэлээбиттэргэ бэйэтин…