Тойбохой түмэлигэр павлин куурусса «оҕоломмут»…

Киһи сөҕө истэр түгэнэ… Сунтаар улууһун Тойбохойдооҕу Георгий Бессонов аатын сүгэр түмэл 2017 сылтан «тыыннаах муннугу» үлэлэтэр.

Билигин бу муннукка  чарапаахы, мурукулар, хомяк, улитка, попугай, холууптар уонна павлиннар бааллар. Түмэлгэ  баар павлиннартан  биирдэстэрэ «кыһыл көмүс» сымыыттан кууруссаны төрөппүт. Хайдах ол?  Дьэ ол маннык:  павлин барахсан сымыытын баттаатаҕын ахсын иччитэ суох буолан иһэллэрин көрөн, үлэһиттэр аһынан, куурусса үс сымыытын укпуттар. Олортон биирдэстэрэ тахсан,  бу павлиҥҥа оҕо буолан улааппыт. Ийэ барахсан бу оҕотун көхсүгэр олордо сылдьан саататара, атыттартан көҥүүрэ, ийэлии истиҥник сыһыаннаһан улаатыннарбыта дьикти. Онтон куурусса барахсан бэйэтин павлин саҕа сананан бэркэ сылдьар.

Бу дьэрэкээн кыыллары Нина Никитина диэн үлэһит көрөр-истэр, кини өссө «Мир животных» диэн куруһуогу үлэлэтэн, оҕолору «тыыннаах муннукк»а чугаһатан үөрэх арааһын ыытар. Оҕолор кыыллары чуо биэс тарбах курдук билэллэр, көрөллөр-харайаллар, кэтээн көрөн чинчийии ыыталлар. Салайааччы Валерий Саввинов түмэл үлэтин биллэ сэргэхситэн, «тыыннаах муннугу» тэрийэн Бессонов саҕанааҕы кэрэ кэми эргитэр үлэни ыытара астык!

Тускулаана Кобельянова-Горохова, Сунтаар