TO:KU FEST — саха анимациятын бэстибээлэ үһүс төгүлүн ыытыллыаҕа

TO:KU FEST — саха анимациятын бэстибээлэ Дьокуускайга үһүс төгүлүн алтынньы 16-18 күннэригэр «Үлэ кыбаартала» креативнай кластер уонна «Дохсун» успуорт уораҕайын былаһааккаларыгар ыытыллыаҕа.

Бу туһунан тэрийээччилэр иһитиннэрдилэр. Кинилэр иһитиннэрбиттэринэн, бырагыраамаҕа саҥа сахалыы ойуулуктар сүрэхтэниэхтэрэ, «Иманы» уонна «Айтал уонна аптаах күүс» саҥа сезоннарын, ону таһынан «Тооку уонна Чысхаан» толору метражтаах ойуулуктар тизердэрэ көстүөхтэрэ. Ону таһынан, Арассыыйаттан ыҥырыылаах эспиэрдэр куонкурус кыттааччыларыгар, оскуола үөрэнээччилэригэр уонна устудьуоннарга анаан лиэксийэлэри уонна маастар-кылаастары ыытыахтара.

Көрөөччүлэри сөбүлүүр бырайыактарын оҥорооччуларын кытта көрсүһүүлэр уонна «Дохсун» успуорт уораҕайыгар дьиэ кэргэнинэн тэрээһиннэр күүтэллэр.

Санатан эттэххэ, былырыыҥҥы бэстибээлгэ аан дойдуга олус киэҥник биллибит «Маша уонна Медведь» ойуулук оҥорооччулара, ону таһынан Казахстантан ыалдьыттар кэлэ сылдьыбыттара. TO:KU FEST уопсайа 2000 киһи болҕомтотун тардыбыта.