Ил Дархан, бырабыыталыстыба дьаһалтатын пресс-сулууспата.
Бэҕэһээ Ил Дархан Айсен Николаев Томпо улууһугар оробуочай сырыытын иитинэн, “Томпо-Ас” тыа хаһаайыстыбатын кэпэрэтиибин үлэтин кытта билистэ. Ил Дархаҥҥа кэпэрэтиип оҥорон таһаарар сыаҕын көрдөрдүлэр.
“Томпо улууһугар саха норуотун үгэһигэр суолталаах тыа хаһаайыстыбатын уонна табаны иитии икки хайысхата олохсуйбут. Хаһаайыстыба бу салаалара улууска күүскэ сайдыбыттар. Хомойуох иһин, урут манна оҥорон таһаарыы сайдыыта суоҕа, билигин, “Томпо Ас” кэпэрэтиип тэриллэн, олохтоох аһы-үөлү оҥоруу саҕаланан эрэр. Дьон үлэлиэн баҕарара көстөр. Мин үлэлиир баҕалаах уонна сатыыр дьону өйүөхтээхпин диэн толкуйдаахпын. Бу курдук кэпэрэтииптэри өрүү өйүөхпүт. Чугастааҕы сылларга манна тыа хаһаайыстыбатын бородууксуйатын хаачыстыбалаах саҥа таһымҥа таһаарыахпыт диэн эрэллээхпин. Улуустааҕы уопсай тыа хаһаайыстыбатын салаалара ситиһиилээхтик сайдалларын курдук өйүөхпүт”, — диэн Айсен Николаев бэлиэтээтэ.
Ааспыт сыл сэтинньититтэн кэпэртиип улууска олохтоох эттэн аһы-үөлү оҥорон атыыга таһааран саҕалаабыта. Маныаха анаан олохтоох табаары оҥорооччулартан 20 туоннаттан тахса ынах этин эбии атыыласпыт. Бу 8 ый устата атыыттан 1 мөл. 140 тыһ. солк. киирбит, атыы бэйэтин суумата – 2 мөл. 923 тыһ. солк.
“Томпо-Ас” ТХПК тыа хаһаайыстыбатын табаары оҥорон таһаарааччылара баҕа өттүнэн түмсүүлэригэр олоҕуран тэриллибит. Кэпэрэтиип 13 чилиэннээх, ол иһигэр хас да нэһилиэктэн 10 бааһынай хаһаайыста киирэр.
Быйыл кэпэрэтиип чилиэнэ, Трофим Охлопков ИП ГКФХ анаан 100 сүөһү турар сайылыгын тутуутугар граҥҥа кыттан кыайбыттар. Хаһаайыстыба барыта 325 төбө сүөһүлээх, ол иһигэр 135 ынахтаах.
Эһиил кэпэрэтиип чилиэнигэр, Виктор Харлампьев ИП ГКФХ анаан Кириэс Халдьаайы сэлиэнньэтигэр Ынахсыт диэн сиргэ 130 төбө турар хотонун тутар былааннаах. Тустаах хаһаайыстыба 318 төбө сүөһүлээх, итинтэн ыанар ынаҕа – 142.
ТХПК салалтата Ил Дархантан эбийиэги Тыа хаһаайыстыбатын министиэристибэтин судаарыстыбаннай бырагырааматыгар киллэрэргэ – тутуутун ороскуотун толуйарга көрдөстө. Итини тэҥэ, тыа хаһаайыстыбатын оҥорон таһаарааччылара, олохтоох оҥорооччулар тиэндэргэ кытталларыгар уонна бородууксуйаларын бигэтик батаралларын туһугар ынах уонна сылгы этин оҥорууну көҕүлүүргэ субсидияны эбэллэригэр көрдөстүлэр.
Ил Дархан хаһаайыстыба оҥорон таһаарар эбийиэгин көрөн баран, “Томпо-Ас” ТХПК салалтата туруорсар боппуоуостарын быһаарарга өрөспүүбүлүкэ тыатын хаһаайыстыбатын министиэристибэтигэр сорудах биэрдэ.
Ил Дархан уонна Бырабыыталыстыба пресс-сулууспата.
«Аҕа дойдуну көмүскээччилэр» судаарыстыбаннай пуонда Саха сиринээҕи салаатын үлэтэ саҕаланыаҕыттан, 11,5 тыһыынчаттан тахса киһиттэн, ол…
2022 сылтан төрүт култуураны тарҕатааччыларга Ил Дархан истипиэндьийэтэ бэриллэр буолбута. Бу кэмтэн уопсайа 81 киһи…
Үөһээ Бүлүү улууһугар ыытыллар «Тыа сирин оскуолата уонна Үөрэх маарката-2025» XXI өрөспүүбүлүкэтээҕи педагогическай дьаарбаҥкаҕа Саха…
Саха сиригэр от ыйын 1 күнүттэн 2025-2026 сс. бултааһын сезонугар саамай тарҕаммыт бултка - көтөрү…
Байыаннай дьайыыга сылдьар хоһуун санаалаах хорсун ыччаттарга Кэбээйи улууһун Куокуй нэһилиэгэр "Надежда" иис түмсүүтэ тиһигин…
От ыйын 8 күнүгэр -- Дьиэ кэргэн күнүгэр Саха сириттэн Архангельскай, Магадаан уобаластарыттан эдэр пааралар…