Томпо ыччаттарыгар — сонун сүүрээн

Бу күннэргэ Томпо улууһугар «Арктическая креативная академия: мост к прошлому – ключ к будущему» бырайыак олоххо киирдэ. Бу хамсааһын Ил Дархан пуондатын уонна Саха сирин үүнэр көлүөнэлэригэр анал сыаллаах пуонда өйөбүлүнэн ыытыллар. Көҕүлээһини НПО-ну олоххо кэлим киллэрии киинэ уонна Саха сиригэр гражданскай көҕүлээһин кииннэрэ өйүүллэр.

Бырайыак чэрчитинэн Томпо улууһун Хаандыга бөһүөлэгэр атырдьах ыйын 11-12 күннэригэр «Арассыыйа Арктикатын инникитин бырайыактааһын» диэн оҕолорго уонна ыччакка үөрэтэр бырагыраама ыытылынна. Тэрээһин эдэр кыттааччылар ортолоругар социальнай дизайн сүрүн дьоҕурдарын сайыннарыыга туһуланна.

25-тэн тахса оҕо уонна ыччат социальнай бырайыактары олоххо киллэрии сүрүн бириинсиптэрин үөрэтэн эрэ буолбакка, бэйэлэрин улуустарын уонна өрөспүүбүлүкэ арктическай улуустарын сайдыытыгар санааларын көхтөөхтүк үллэһиннилэр. Кыттааччылар төһө да эдэрдэрин үрдүнэн, инфраструктураны тупсарыыга, ыччат бары өттүнэн сайдарыгар, бэйэтин кыаҕын сайыннарарыгар усулуобуйаны тэрийиигэ сыһыаннаах улахан суолталаах боппуруостары туруорустулар, ону быһаарар суоллары көрдөөтүлэр.

«Кыттааччылары социальнай дизайн төрүттэрин кытта, итиэннэ оҕолорго уонна ыччакка аналлаах граннарга күрэхтэһиилэр көрүҥнэрин билиһиннэрдибит. Оҕолор бырайыактары оҥоруохтарын баҕарар хас да сытыы боппуруоһу талан ыллылар. Тиэмэлэргэ төрөппүт уонна оҕо сыһыаннара, ону тэҥэ төрөөбүт тылы уонна култуураны харыстааһын киирдилэр», — диир Кэлим ресурснай киин методиһа уонна бырайыак цифровой салайааччыта Леонид Саввин.

Сиһилии сигэнэн билсиҥ.