Томпоҕо улахан ойуур баһаара бохсулунна

Томпо улууһун Хаандыгатын уонна Теплай Ключ икки ардыгар турбут улахан баһаар бохсулунна.

Бу туһунан бүгүн экология, айылҕаны туһаныы уонна ойуур хаһаайыстыбатын миниистирин солбуйааччы Андрей Коноплев брифиҥҥэ иһитиннэрдэ.
Уоту бохсуу кэмигэр 112 676 га иэннээх сир сиэниллибитэ быһаарылынна.
Билигин 126 киһи уоту умуруорууга үлэлиир.
Суукка иһигэр 116 тыһыынча 697 га иэнээх сиргэ 9 ойуур баһаара бохсулунна.
Томпо улууһун баһаарын сэргэ Алдан, Дьааҥы, Ленскэй, Өлүөхүмэ, Уус Маайа оройуоннарыгар баһаар бохсулунна.

Салгынынан уонна космостан кэтээн көрүүнэн, 1190,5 га иэннээх сиргэ 11 ойуур уонна 1 айылҕа баһаара турбута бэлиэтэннэ.
Уопсайа билиҥҥитэ 18 улууска 107 ойуур баһаара уонна биир
айылҕа баһаара баара биллэр.
Уоту кытары 1431 киһи уонна 74 тиэхиньикэ үлэлиир. Ону таһынан салгын суудуната үлэлиир.
Өрөспүүбүлүкэ иһигэр ойуур баһаардара турбутунан ыксаллаах быһыы-майгы эрэсиимэ олохтонон турар.
Олохтоох ыксаллаах быһыы-майгы эрэсиимэ Үөһээ Халыма, Үөһээ Бүлүү, Уус Маайа, Орто Халыма, Томпо уонна Өлүөхүмэ улуустарыгар олохтоммута.