«Томтор-Өймөкөөн» суолун өрөмүөнүгэр олохтоох урбаанньыт Мария Гарифуллина ылыста

Бүгүҥҥү күҥҥэ халаан иэдээнин чөлүгэр түһэрии үлэтин саамай хорук тымырынан «Томтор-Өймөкөөн» суолун өрөмүөнэ буолар.

Бу суолталаах үлэ бэдэрээччитинэн Үчүгэй нэһилиэгин урбаанньыта Мария Гарифуллина буолар. Мария Васильевна иһитиннэрбитинэн, 45 км уһуннаах суол 21 сиринэн алдьаммыт. Онтон 16 учаастагы оҥордулар.

«Икки погрузчик уонна үс улахан кыамталаах көлө үлэлии сылдьар. Быстах кэмҥэ суолу арыйар инниттэн бириэмэни билбэккэ үлэлиибит. Сыыйа суолу бөҕөргөтүүгэ 10 улахан кыамталаах көлө үлэлиэҕэ«, — диэн бэлиэттээтэ Мария Гарифуллина.

Үчүгэй нэһилиэгин урбаанньыта улуус суолларын бэрт хаачыстыбалаахтык оҥорорунан биллэр. Былырыын Төрүт суолун бу тэрилтэ оҥорбута. Төрүттэр «быйылгы халааҥҥа Гарифуллина суола бэркэ тулуста» диэн үөрэ кэпсэтэллэр. Онон «Томтор-Өймөкөөн» суола эрэллээх илиигэ киирэн, сотору кэминэн манна айан-сырыы бигэтик олохтонуоҕа.