«Тоҥ-Jazz» джаз муусукатын бэстибээлэ ыытыллыаҕа

Дьокуускайга олунньу 14-15 күннэригэр «Тоҥ-Jazz» Бүтүн Арассыыйатааҕы джазовай муусука бэстибээлэ сэттис төгүлүн ыытыллыаҕа. Бэстибээлгэ Уһук Илин эрэгийиэннэрин биллэр-көстөр джазовай муусукааннара кэлэн кытталлар.

Олунньу 13 күнүгэр Хабаровскайтан, Владивостоктан кэлбит муусукааннар Антон Березкин, Иван Самарин уонна ырыаһыт Юлия Кан пресс-кэмпириэнсийэҕэ кытыннылар.

Егор Ефимов, тэрийээччи, продюсер:

— Бэстибээлгэ латино, классика, бэл, былыргы саха ырыата уонна буруолуу сылдьар сабыс-саҥа ырыа иһиллиэҕэ. Алексей Егоров-Өркөнү кытта бырагыраама толкуйдаатыбыт. Кини ырыаларын урут Владивостокка, Хабаровскайга оонньообуппут. Биһиги саха тылын джаз эйгэтигэр киллэрэргэ кыһаллабыт.

— Саха сиригэр джаз муусукатын сайыннарарга өйөбүлү көрсөҕүт дуо?

— Мин Москваҕа джазовай оскуолаҕа үөрэммитим. Онтон манна Ил Дархан иһинэн үлэлиир Инновационнай менеджмент оскуолатыгар үөрэммитим, онно улахан өйөбүл баара. Биллэн турар, дойду таһымнаах бэстибээли тэрийии сыралаах. Ол эрээри, истээччилэрбит, көрөөччүлэрбит күүтэллэрэ, эрэнэллэрэ биһиэхэ күүс эбэр, — диэн Егор Ефимов бэлиэтээтэ.

Салгыы Антон Березкин Хабаровскай куоракка джаз муусукатын хайдах сайыннаралларын кэпсээтэ. »Интэриэс улахан, филармония саалалара тобус-толору буолааччылар», — диэн эттэ. Чахчы, Хабаровскай — Уһук Илиҥҥэ джазовай муусука киинэ буолар.

Оттон Владивостоктан кэлбит Иван Самарин интэриэс баарын, джазовай бэстибээл сэбиэскэй кэм саҕаттан ыытылларын кэпсээтэ.

»Джаз бүтүннүүтэ тапталтан турар» диэн эттилэр, онон бэстибээл Таптал күнүгэр түбэспитэ мээнэҕэ буолбатах.

Дьокуускай куоракка »Осенний джаз» бэстибээл буолааччы, ону салгыахтарын баҕараллар. Джаз кулуубун, эбэтэр, оркестрын тэрийиэхтэрин толкуйдууллар эрээри, билиҥҥитэ кыаллыбат. Билиҥҥитэ Саха сиригэр джаз көрүҥүн энтузиазм күүһүнэн сайыннараллар.

»Бу күннэргэ Дьокуускай джазовай муусука киинэ буола түһүөҕэ, тоҕо диэтэр, бастыҥ муусукааннар түмсүөхтэрэ», — диэн Егор Николаевич эттэ.

Олунньу 14 күнүгэр киэһэ 6 чаастан Судаарыстыбаннай циркэ уораҕайыгар бэстибээл аһыллыыта, улахан кэнсиэр буолуоҕа. Манна муусукааннар Егор Ефимов, Александр Каплун, Валентин Парфенов, Владислав Семенов, Николай Михеев, ORDO бөлөх, »Самое время» бөлөх кыттыахтара, ырыаһыттар Өркөн, Леонид Анциферов, Юлия Кан, Оксана Чупикова, Алексей Солдатов, Ай-Саара ыллыахтара. Надикан хомуска доҕуһуоллуоҕа. Араас куораттартан мустубут муусукааннар »Сборная джаза Дальнего Востока» бырагырааманан оонньууллара интэриэһинэй буолуоҕа.

Салгыы 9 чаастан »Крыша» эрэстэрээҥҥэ »ДЖЕМ-сессия» ыытыллыаҕа, манна баҕалаах муусукааннар бары оонньуохтарын, айыахтарын-тутуохтарын сөп.

Олунньу 15 күнүгэр Муусукааннар дьиэлэригэр маастар-кылаас ыытыллыаҕа.