Тоҥолоҕунан сирэйгэ саайбыт… Киһи өлбүт…

Дьокуускайга ыарахан буруйу оҥоруу дьыалата суукка бэрилиннэ. Бу туһунан Дьокуускай к. борокуратуурата иһитиннэрэр.

Дьокуускай к. борокуратуурата Нам улууһун олохтооҕор — орто анал үөрэх кыһатын устудьуонугар холуобунай дьыалаҕа буруйдуур түмүгү бигэргэттэ. Кини Холуобунай кодекс 111 ыстатыйатын 4 чааһынан буруйданар.

Силиэстийэҕэ биллибитинэн, буруйданааччы Ленин проспегар баар түүҥҥү бар кирилиэһигэр туран, биир итирик киһини кытта тыл бырахсан, устунан иирсэн барбыттар. Онтон ол киһини тоҥолоҕунан сирэйгэ саайбыт.

Ол түмүгэр, охсуллубут киһи сууллан түһэн, төбө-мэйии эчэйиитин ылбыт, чөмчөкөтүн уҥуоҕа эчэйбит. Балыыһаҕа өр кэм устата эмтэнэ сытан баран, эр киһи тыына быстыбыт.

Холуобунай дьыаланы борокуруор сиһилии силиэстийэлииргэ ыытта.