«Тооку» бэстибээл быйыл икки сиринэн ыытыллыаҕа

Быйыл оҕолорго, төрөппүттэргэ анаан сыллата тэриллэр TO:KU FEST — сахалыы ойуулук түһүлгэтэ икки сиргэ буолуоҕа.

Алтынньы 17 күнүгэр «Үлэ кыбаартала» креативнай кластерга:
—  «Тооку» оҕо ханаалын ойуулук худуоһунньуктара оскуола үөрэнээччилэригэр маастар-кылаастары ыытыахтара (https://tookufestnvk.ru/ сайт нөҥүө эрдэттэн суруттарыы ирдэнэр).

— Устудьуоннарга уонна исписэлиистэргэ: «Айар уус» индустриятын  эспиэрдэрэ лиэксийэ ааҕыахтара.

Алтынньы 18 күнүгэр «Дохсун» спорт уораҕайыгар улахан бырааһынньык буолуоҕа. Түһүлгэни түмүктүүр күн оҕолор уонна төрөппүттэр сынньалаҥнарыгар аналлаах. Ол курдук:
— Айар бөлөхтөр кэнсиэрдэрэ,
— Саҥа ойуулуктар сүрэхтэниилэрэ,
— Национальнай спорт араас көрүҥнэригэр, остуол оонньууларыгар уонна музыкальнай инструменнарга оонньуурга үөрэтэр маастар-кылаастар буолуохтара.
Түһүлгэ партнердара оҕолорго  көрдөөх уонна сайыннарар оонньуулары ыытыахтара.

Бэстибээлгэ кырачааннары уонна кинилэр төрөппүттэрин күүтэллэр. Киириитэ босхо.