«Тооку уонна Чысхаан» толору кээмэйдээх ойуулук улахан экраҥҥа тахсыа!

Ахсынньы 18 күнүттэн Дьокуускай куорат «Лена», «Синема», «Центральнай» уонна өрөспүүбүлүкэ үрдүнэн тарҕанан олорор «Сахафильм», «Экстра Синема» хампаанньалар киинэлэрин саалаларыгар аан маҥнайгы толору кээмэйдээх «Тооку уонна Чысхаан» ойуулук сүрэхтэниэҕэ!

Маны таһынан сахалыы тыллаах ойуулук дойду тэбэр сүрэҕэр Москуба куоракка эмиэ көстүөҕэ. «Тооку уонна Чысхаан» ойуулук Тооку диэн элбэх сиэрийэлээх ойуулук матыыбыгар сөп түбэһиннэрэн оҥоһулунна. Айар хамаанда түөрт сыл тухары «Тооку» ойуулук 40 сиэрийэтин оҥордо. Онтон бу 2025 сылга хорсуннук уһун кээмэйдээххэ ылыста. 2022с бастакы айар дьылга — Тооку 20 сиэрийэтэ тулалыыр эйгэни үөрэппитэ, салгыы 2023с иккис айар дьыл Саха сирин кэрэ сирдэрин, онтон 2024с, сыл аннараа өттүгэр Тооку 10 сиэрийэтэ бэлиэ күннэри ойуулаабыта.

Мэник-тэник, ол эрэн хорсун-хоодуот кулунчук оҕото Тооку хайы үйэ кырачааннар сүрэхтэрин биһирэбилин ылыан ылла!

Ойуулук ис хоһоонун туһунан кыратык кэпсээтэххэ, манна Саҥа Дьыллааҕы аптаах-алыптаах остуоруйа кэпсэнэр. Былыр-былыргыттан иһийэн турбут ирбэт тоҥ — эмискэ ирэн барар. Онуоха Тоокулаахха Хаарчаан кэлэн, Чысхаан оҕонньор алдьархайга түбэспитин, саҥа дьыл үүммэт кутталламмытын иһитиннэрэр. Тооку уонна кини доҕотторо Сулус, Мичийэ уонна Чуу Саҥа дьылы быыһыы мүччүргэннээх айаҥҥа туруналлар. Кинилэри кытта бу Моруунньа уонна Хоруунньа эмиэ барсыахтара. Ойуулукка саҥа дьоруойдары кытта билсиэххит.

Дьэ, Тоокулаах Чысхааны быыһыахтара дуо? Саҥа дьылы төннөрүөхтэрэ дуо?

Режиссер: Виктория Кейметинова
Фон худуоһунньуга : Александра Сосина
Худуоһунньук-аниматордар: Екатерина Христофорова, Арылхан Ноговицын, Аэлита Соколова
Сценарист: Саргылаана Сандаар
Композитор: Николай Михеев
Звукорежиссер: Татьяна Босенко
Редактор: Анна Васильева
Продюсер: Анна Кириллина

Билиэттэр МОСТ, Afisha.ykt уонна киинэ тыйаатырдарын кассатыгар атыыга таҕыстылар! «Тооку уонна Чысхаан» толору кээмэйдээх ойуулугу улахан экраҥҥа көрүҥ!

https://appmost.ru/afisha/release/8991?city_id=125

https://afisha.ykt.ru/events/view?id=9457&date=2025-12-18