Торҕон эһэнэн оонньоомоҥ!

Бу күннэргэ социальнай ситимнэргэ Уус Маайа уонна Томпо улуустарын торҕоннообут эһэлэр дьону буулаабыттарын туһунан киһини уолутар сурахтар тарҕаннылар.

Кистэл буолбатах, ити улуустарга, ыаллыы сытар Хабаровскай кыраайга хас да сылы быһа ойуур баһаардара буоллулар. Онон “дьиэтэ-уота” суох хаалбыт кырдьаҕастар мэнээктиэхтэрин да сөп курдук.

Ол гынан баран уотунан оонньуур сэрэхтээх. Хаандыгаҕа бөһүөлэк аттыгар эһэ суолун көрдүбүт диэн сурах тарҕанан, экологтар, булчуттар, полиция, Росгвардия үлэһиттэрэ эһэ саһа сытыан сөптөөх сирдэрин кэрийбиттэр да, ханна да суолу көрбөтөхтөр диэн иһитиннэрэр “Томпонский вестник” хаһыат.

Аны Уус Маайа улууһугар Айым диэн сиргэ биир дьахтар икки торҕон эһэни ытан өлөрдө диэн сурах барда. Уус Маайатааҕы Экологическай кэтэбил инспекциятыгар эрийэн тиийбиппитин, бу сурах сымыйа диэтилэр.