ТОС (түөлбэ) сайдыытын өйүүргэ Ил Дархан граннарын куонкуруһугар сайаапкалары ылыы саҕаланна

Бүгүн, 2025 сыл муус устар 1 күнүттэн, https://grants.yakutia.click порталга Ил Дархан граннарын куонкуруһугар сайаапкалары ылыы саҕаланна.

Сайаапкалары 2025 сыл муус устар 15 күнүгэр киэһэ 18:00 чааска диэри туталлар, диэн иһитиннэрэр Ил Дархан, бырабыыталыстыба пресс-сулууспата.

Грант уопсай суумата 10 мөлүйүөн солкуобай. Сайаапкалары муниципальнай оройуоннар, куорат уокуруктара биэриэхтэрин сөп.

СӨ Ыччат уонна социальнай коммуникация министиэристибэтэ быһаарбытынан, кыттыан баҕалаах сайаапка биэрээччи регистрацияланыахтаах уонна “ТОС сайыннарыы куонкуруһа” диэн салааҕа сайаапкатын электроннай көрүҥүн толоруохтаах.

«Хайаан да маннык докумуоннар бэриллиэхтээхтэр: куонкурус кыттааччытын  билиҥҥи эрэдээксийэтинэн сылдьар нормативнай-правовой аактатын электроннай сканердаммыт куопуйата; муниципальнай бырагыраама, алын бырагыраама, тэрээһиннэр электроннай сканердаммыт куопуйалара; муниципальнай оройуон эбэтэр куорат уокуругун быйылгы финансовай сылын бүддьүөтүн туһунан быһаарыытын выпискатын  электроннай сканердаммыт куопуйата», — диэн тэрийээччилэр эбэн эттилэр.

Куонкурус үс түһүмэҕинэн ыытыллар:

Бастакы түһүмэх — муниципальнай оройуоннар, куорат уокуруктарын дьаһалталарын икки ардыларыгар боломуочуйалаах уорган ыытар куонкуруһа;

Иккис түһүмэх – муниципальнай тэриллиилэр ортолоругар бастакы түһүмэххэ кыайбыт муниципальнай оройуон дьаһалтатын ыытар куонкуруһа;

Үһүс түһүмэх – социальнай суолталаах бырайыактары өйүүргэ территориальнай уопсастыбаннай бэйэни салайыныылар ортолоругар иккис түһүмэххэ кыайбыт муниципальнай тэриллии ыытар куонкуруһа.

Граннар тэҥ үбүлээһиннээх маннык хайысхалаах бырагыраамаларга, алын бырагыраамаларга уонна тэрээһиннэргэ бэриллэллэр:

1) территориальнай уопсастыбаннай бэйэни салайыныылар култуурунай-маассабай, чэбдигирэр, спортивнай тэрээһиннэри тэрийиигэ;

2) төрөөбүт дойду, төрөөбүт тыллар устуоруйаларын баарынан тутан сылдьыыга. олохтоох историческай-култуурунай нэһилиэстибэни туһаныыга, норуот үгэстэрин уонна оҥоһуктарын харыстааһыҥҥа;

3) байыаннай дьайыы кэмигэр сорудаҕы толорууну хааччыйар доброволецтары, байыаннай сулууспалаахтары, мобилизацияламмыт дьону өйөөһүҥҥэ, кинилэр дьиэ кэргэттэрин, аймахтарын социальнай арыаллааһыҥҥа;

4) култуурунай көҕүлээһиннэри уонна туризмы сайыннарыыга;

5) территорияны тупсарыыга уопсастыбаннай көҕүлээһиннэри сайыннарыыга;

6) нэһилиэнньэ социальнай өттүнэн көмүскэлэ суох бөлөхтөрүн өйөөһүҥҥэ;

7) экологическай култуураны сайыннарыыга уонна нэһилиэнньэ куттала суох буолуутун хааччыйыыга;

8) уопсастыбаннай эйгэни оҥорууга уонна сайыннарыыга.

Куонкурус туһунан сиһилии иһитиннэриини бу сигэҕэ киирэн ааҕыаххытын сөп: https://grants.yakutia.click/media/files/Объявление_ТОС.pdf.

Ыйытыылаах буоллаххытына, бу нүөмэргэ эрийэн билсиҥ: 8 (4112) 507-123, СӨ Ыччат уонна социальнай коммуникация министиэристибэтин гражданскай уопсастыба институттарын кытта хардарыта дьайсыы департамена.