Трамп Арассыыйаҕа сорох санкцияны тохтоторго сорудахтаата

Америка Холбоһуктаах Штаттара Арассыыйаҕа санкциялары сымнатар кыаҕы көрөллөр.

Бэрэсидьиэн Дональд Трамп икки дойдулар ардыларыгар дипломатическай уонна экэнэмиичэскэй сибээстэри чөлүгэр түһэрэргэ уонна Украинаҕа конфликтары тохтоторго дьулуһар. Бу туһунан Reuters иһитиннэрбитин ТАСС суруйар.

«Бэрэсидьиэн дьаһалтата Судаарыстыбаннай департамеҥҥа уонна Үп министиэристибэтигэр тохтотуллуон сөптөөх санкциялар испииһэктэрин бэлэмнииргэ көрдөспүт. Бу дьаһаллар Арассыыйа бэрэстэбиитэллэрин кытта кэлэр кэпсэтии кэмигэр дьүүллэһиэхтэрэ. Сүрүн сыала — Москва уонна Вашингтон икки ардыларыгар уопсай сыһыаны тупсарыы буолар», — диэн Reuters иһитиннэрэр.

Санкцияларынан дьарыктанар биэдэмистибэ Арассыыйа бизнесменнэрин киллэрэн туран, юридическай уонна физическэй сирэйдэри утарар хааччахтары суох оҥорорго этиини бэлэмнииллэр.