«Триумф» дириэктэрэ Парижка диэри билиэттэри атыылаһан ыстарааптанна

«Триумф» успуорт уораҕайын дириэктэрэ бүддьүөт сокуонун кэһии иһин административнай эппиэтинэскэ тардылынна.

Бу туһунан СӨ Борокуратуурата иһитиннэрэр. 2024 сыл атырдьах ыйыгар тэрилтэ судаарыстыбаннай сорудаҕы толорууга субсидия быһыытынан көрүллүбүт үбү-харчыны сокуоннайа суох туһаммыт. Бүддьүөт харчыта дириэктэр уонна икки үлэһит билиэттэрин атыылаһыыга, Париж куоракка  ХХХIII сайыҥҥы Олимпийскай оонньууларга командировка быһыытынан ороскуоттаммыт.

Сокуоннайа суох туһаныллыбыт харчы суумата 900 тыһ. солк. буолбут. Манан сибээстээн, «Триумф» дириэктэрэ административнай эппиэтинэскэ тардылынна. Суут быһаарыытынан дириэктэр 20 тыһыынча солкуобайга ыстарааптанна.

Ону таһынан борокуратуура сокуоннайа суох туһаныллыбыт үбү-харчыны төннүннэрэргэ этии киллэрдэ. Бу боппуруос көрүллэр уонна хонтуруолга сылдьар.