Хаартыска sakha.gov.ru ылылынна
Бүгүн Дьокуускайга «Триумф» успуорт уораҕайыгар дуобакка 500 дуоскаҕа оонньоотулар.
Биир кэмҥэ тэҥҥэ дуобаттааһын сеансыгар, икки эбэтэр хас да киһи, бэйэ-бэйэлэрин кытары сүбэлэспэккэ эрэ хардарыта уочаратынан хаамыылары оҥорон иһэллэр.
Ил Дархан Айсен Николаев бэлиэтээбитин курдук, өрөспүүбүлүкэҕэ дуобат күүскэ сайдар, ол гынан баран өссө иннибит диэки дьулуһан иһиэххэ наада. «Өрөспүүбүлүкэҕэ эбии үөрэхтээһин тиһигэр өйү-санааны, толкуйу сайыннарар оонньуулары — дуобаты, шахматы, Го оонньууну уо.д.а. көхтөөхтүк киллэрэн, сайыннаран иһиэххэ наада«, — диэн этэр Ил Дархан.
Бүгүҥҥү түһүлгэҕэ Дьокуускайтан уонна чугастааҕы оройуоннартан дуобаты таптааччылар, уопсайа 500 киһи кытынна.
СӨ Бырабыыталыстыбатын бэрэссэдээтэлин солбуйааччы Сергей Местников биһиги өрөспүүбүлүкэбитигэр нэһилиэнньэ дуобаты таптыырын, сэргиирин тоһоҕолоон бэлиэтээтэ. Өрөспүүбүлүкэ бастакы бэрэсидьиэнэ Михаил Ефимович Николаев болҕомтотун ууран, хамсааһын маассабай буолбута уонна Саха сирин бары оройуоннарыгар тиһиктээхтик сайдар.
Тэрээһиҥҥэ уопуттаах 50 судьуйа кыттар, кинилэр оонньууну кэтээн көрөллөр уонна сүрүн судьуйаҕа, сэкирэтээргэ түмүктэри иһитиннэрэн иһэллэр.
Сеансы аҕыс гроссмейстер биэрэр: Александр Азаров, Саха сирин бастакы гроссмейстера, дуобакка аан дойду чөмпүйэнээтин боруонса призера, Гаврил Колесов, норуотар икки ардыларынааҕы гроссмейстер, Европа чөмпүйүөнэ, аан дойду 12 төгүллээх чөмпүйүөнэ, Иван Токусаров, норуоттар икки ардыларынааҕы гроссмейстер, Европа чөмпүйүөнэ, аан дойду 2 төгүллээх чөмпүйүөнэ, Николай Стручков, норуоттар икки ардыларынааҕы гроссмейстер, аан дойду 4 төгүллээх чөмпүйүөнэ, Европа чөмпүйүөнэ, Матрена Ноговицына, норуоттар икки ардыларынааҕы гроссмейстер, Европа чөмпүйүөнэ, аан дойду 5 төгүллээх чөмпүйүөнэ, Андрей Федотов, норуоттар икки ардыларынааҕы гроссмейстер, аан дойду 2 төгүллээх чөмпүйүөнэ, Наталья Шестакова, норуоттар икки ардыларынааҕы гроссмейстер, Европа чөмпүйэнээтин үрүҥ көмүс призера, Ксения Нахова, норуоттар икки ардыларынааҕы гроссмейстер, Европа чөмпүйэнээтин үрүҥ көмүс призера.
Санатан эттэххэ, бу тэрээһин дуобат историятыгар биир бириэмэҕэ тэҥҥэ оонньуурга саамай маассабай сеанс быһыытынан, «Интеррекорд» диэн рекордары регистрациялыыр норуоттар икки ардыларынааҕы ааҕыныстыбаҕа регистрацияланар.
СӨ Ил Дарханын уонна Бырабыыталыстыбатын пресс-сулууспата
Лев Павлов көҥүл тустууга юниордар истэригэр аан дойду чөмпүйэнээтигэр үрүҥ көмүс мэтээли ылары ситистэ. Кини…
Бүгүн, балаҕан ыйын 8 күнүгэр, Саха сирин соҕуруу, хотугулуу-илин, күнүс арҕаа улуустарыгар сорох сиринэн ардах,…
Бүгүн НТВ ханаал “Чудо” биэриитигэр Сунтаар улууһун Элгээйи орто оскуолатын үөрэнээччитэ, эдэр орнитолог, 11 саастаах…
Аҕыйах хонуктааҕыта Сунтаар улууһун Куокуну нэһилиэгэр Улахан Табаҕа киэҥ нэлэмэн, үрдүк үүнүүнү биэрэр бааһыната талах…
Оҕо барахсан хайа да кэмҥэ арахсыспат аргыһа – оонньуур буоллаҕа. Онон “Наука 0+” билим бэстибээлин…
Бу күннэргэ өрөспүүбүлүкэ улуустарыгар ититии сезона саҕаланан эрэр. Мэҥэ Хаҥалас улууһун пресс-сулууспата дьаһалта телеграм-ханаалыгар иһитиннэрбитинэн,…