«Триумфка» «Хаҥалас хапсаҕайа» турнир тыҥааһыннаах киирсиилэрэ саҕаланнылар

Киин куоракка «Триумф» успуорт уораҕайыгар тыҥааһыннаах киирсиилэр саҕаланнылар. Хапсаҕайдаһан тустууга норуоттар икки ардыларынааҕы күрэхтэһии көбүөрүгэр 403 тустуук тахсыаҕа.

«Хаҥалас хапсаҕайа» Гран-при хапсаҕайдаһан тустууга норуоттар икки ардыларынааҕы турнир Монголияттан, Кытайтан, Узбекистантан, Азербайджантан, Грузияттан, Индияттан, Эстонияттан, Кыргызстантан уонна Италияттан кэлбит тустууктары, ону таһынан Бурятия, Татарстан, Тыва, Алтай Өрөспүүбүлүкэлэрин, Иркутскай уобалас, Хакасия Өрөспүүбүлүкэтин, Забайкальскай кыраай уонна Саха Өрөспүүбүлүкэтин бэрэстэбиитэллэрин түмтэ. Турнир уопсай бирииһин пуондата 5 мөлүйүөн солкуобай кэриҥэ, оттон күрэхтэһии чыпчаалынан үгэс быһыытынан муҥутуур кыайыылааҕы быһаарыы буолуоҕа.

Санатан эттэххэ, хапсаҕайдаһан тустуу  Кыргыз Өрөспүүбүлүкэтигэр ыытыллар Көс омуктар бүтүн аан дойдутааҕы оонньууларын бырагырааматыгар киллэриллибитэ. Бу туһунан Көс омуктар бүтүн аан дойдутааҕы оонньууларын Норуоттар икки ардыларынааҕы секретариатын салайааччытын солбуйааччыта Белек Нурбекович Усенбеков иһитиннэрбитэ.

Бүгүн күрэхтэһии алта ыйааһын категориятыгар ыытыллар. Түмүктүүр киирсиилэр 17.00 чааска былааннаналлар. 18.00 чааска үөрүүлээх аһыллыы сиэрэ-туома буолуоҕа. Ити кэннэ 75 киилэттэн үөһээ ыйааһыҥҥа муҥутуур кыайыылаах быһаарыллыаҕа.

Турнир быһа эпиирин ВКонтакте көрүөххэ сөп:

А көбүөр: https://vk.com/video-229216252_456239024

B көбүөр: https://vk.com/video-229216252_456239025

С көбүөр: https://vk.com/video-229216252_456239026