«Тропами Победы» – “Дальний Восток – Земля приключений” куонкурус саҥа номинацията

 «Дальний Восток – Земля приключений» куонкуруска “Тропами Победы” (“Кыайыы ыллыгынан”) диэн саҥа номинация баар буолла. Номинация чэрчитинэн, кыттааччылар Уһук Илин уонна Арктика  эрэгийиэннэригэр бойобуой албан аат миэстэлэригэр похуоттар тустарынан киинэлэри устуохтаахтар.

«Быйыл  дойдубут Аҕа дойду Улуу сэриитигэр Кыайыы 80 сылын бэлиэтиир. Биһиги төрөөбүт дойдуларын көмүскээбит уонна фашизмы кыайбыт аҕаларбыт, эһээлэрбит хорсун быһыыларын туһунан өйдөбүнньүгү көлүөнэттэн көлүөнэҕэ тириэрдиэхтээхпит. Уһук Илин уонна Арктика Кыайыыга биллэр кылааты киллэрбиттэрэ. Хотугу муора суола таһаҕаһы тиэйэргэ уонна тыылы хааччыйарга  дьоһун суолталаах суолунан буолбута.  Уһук Илиҥҥэ аан дойду иккис сэриитэ түмүктэммитэ. Уһук Илин уонна Хотугу сир олохтоохторо пуруоҥҥа уонна тыылга Кыайыыны чугаһатыспыттара. Дойдубут  көҥүлэ төһөлөөх сыранан ылыллыбытын билигин ыччаттарга  санатар улахан суолталаах”, — диэн РФ бырабыыталыстыбатын бэрэссэдээтэлин солбуйааччы – Уһук Илиҥҥэ РФ бэрэсидьиэнин боломуочуйалаах бэрэстэбиитэлэ Юрий Трутнев иһитиннэрдэ.

«Тропами Победы»  анал номинация байыаннай-устуоруйа туризмын сөргүтүүгэ, Уһук Илиҥҥэ уонна Арассыыйа Арктикатын зонатыгар бойобуой албан аат миэстэлэригэр похуоттар тустарынан видеороликтары устан, дойду дьоруойдарын туһунан өйдөбүнньүгү хаалларыыга хайысхаланар.

Куонкуруска кыттарга   Уһук Илинҥҥэ эбэтэр Арктикаҕа бэйэҕит айаҥҥыт-сырыыгыт туһунан 8 мүнүүтэ уһуннаах,  кылгас кээмэйдээх киинэни устаҕыт  уонна путешественникдв.рф саайтынан дьүүллүүр сүбэ көрүүтүгэр ыытаҕыт. Айан-сырыы 2023 сыл ыам ыйын 1 күнүн кэнниттэн  уонна 2026 сыл тохсунньу 15 күнүн аһарбатах буолуохтаах. Видео-матырыйааллар анал камераҕа эбэтэр мобильнай төлөпүөҥҥэ уһуллубут буолуохтарын сөп – устуу хаачыстыбата быһаарар оруола суох.

Номинация кыайыылааҕа – 500 тыһыынча солкуобай, иккис миэстэлээх – 300 тыһыынча солкуобай, үһүс миэстэлээх 200 тыһыынча солкуобай суумалаах харчынан бирииһи ылаллар. Дьүүллүүр сүбэ быһаарыытынан, атын киинэлэр эмиэ харчынан бириэмийэлэниэхтэрин сөп.

Ону таһынан “Тропами Победы” номинацияҕа киинэлэрин ыыппыт кыттааччылар “Дальний Восток – Земля приключений” куонкурус сүрүн номинацияларыгар кыттыахтарын эмиэ сөп.

СӨ Ил Дарханын уонна бырабыыталыстыбатын пресс-сулууспата