Хаартыска minobrnauki.sakha.gov.ru
Бүлүү улууһугар лүөччүк-космонавт, Арассыыйа Федерациятын Дьоруойа Олег Германович Артемьев оробуочай сырыынан кэллэ.
Олег Артемьев кэлээт даҕаны Үгүлээт нэһилиэгэр 50 миэстэлээх уһуйаан аһыллыытыгар кытынна. Бу дьыссаат “2020-2025 сылларга тыа сирин-уотун кэлимсэ сайыннарыы” судаарыстыбаннай бырагыраама чэрчитинэн тутуллубута. “Якутгазпроект” ХЭТ бырайыактаабыта. “Приоритет” ХЭТ тутан, үлэҕэ киллэрдэ. Онон 141,737 мөл солк. эбийиэк тыа сиригэр тутулунна. Маннык үөрүүлээх түгэҥҥэ Арассыыйа Дьоруойа кыттыыта эмиэ биир умнуллубат бэлиэ түгэн.
Үгүлээт нэһилиэгэр “Тугутчаан” дьыссаат аһыллыытыгар үөрэх уонна наука миниистирэ Ирина Любимова маннык эттэ:
— Дьыссаат эбэтэр оскуола саҥа дьиэтин арыйыы бу Саха сирин олохтоохторун олоҕун уйгутун тупсарыыга хардыынан буолар. Манна иитиллээччилэри сайыннарар туһугар “Робототехника”, “Моделирование”, “Умелые ручки” эбии куруһуоктар үлэлииллэрэ олус үчүгэй. Ону сэргэ “Талааннаах оҕо”, “Муусука барыбытыгар” өрөспүүбүлүкэтээҕи бырайыактар үлэлииллэр. Сыл аайы оскуола иннинээҕи үөрэх тэрилтэтин иитиллээччилэрэ “Күһүн кырааската” Бүтүн Арассыыйатааҕы куонкуруска, өрөспүүбүлүкэтээҕи “Бриллиантовые нотки”, “Мин – лиидэрбин” улуус күрэхтэһиилэригэр кытталлара үөрдэр. Бу барыта оҕолору эргиччи сайыннарар”.
Лүөччүк-космонавт ол кэнниттэн Бүлүү к. айаннаабыта.
Бүлүүгэ Олег Германовиһы үөрэнээччилэр ракета пааматынньыгын таһыгар көрүстүлэр. Оройуон баһылыга Сергей Винокуров Дьоруойу эҕэрдэлээн туран, кинини Бүлүү ыалдьытымсах сиригэр уопсастыбаннас үөрэ-көтө көрсөрүн бэлиэтээтэ.
Үөрэнээччилэр космонавтан бэрт элбэҕи ыйыталастылар: космоска бириэмэ төһө түргэнник ааһарын, ракета көтүүтүн уонна олоруутун, орбитаҕа хайдах сынньаналларын, таҥаһы хайдах сууйалларын, космоска оскуолаҕа ылбыт билии хайдах туһанылларын уо.д.а. туһунан. Онуоха Олег Германович оҕолорго баҕалаах киһи үгүһү ситиһиэн сөбүн туһунан сүбэлээтэ.
Кини салгыы Кыраайы үөрэтэр мусуойга уонна Ыччат бибилэтиэкэтигэр сырытта. Киниэхэ анаан экскурсия тэрийдилэр. Кинигэҕэ илии баттаан, улуус бибилэтиэкэтигэр бэлэхтээтэ. Оттон бэйэтин мэтириэтин П.Х.Староватов аатынан кыраайы үөрэтэр мусуойга туттарыахтара.
Саха сирин олохтоохторо улуустар уонна нэһилиэктэр баһылыктарын, итиэннэ оройуон уонна нэһилиэк дьокутааттарын таллылар. "Улуус баһылыктарынан…
Саха сиригэр «яконтракт14.рф» саҥа саайт нөҥүө хантараагынан байыаннай сулууспаҕа барааччылар сайаапка хаалларыахтарын сөп. Российскай Федерация…
Биир дойдулаахпыт 17 саастаах Артур Портнягин НТВ ханаалыгар «Ты супер!» биэриигэ ыллаата. Дьүүллүүр сүбэ --…
Алта күннээх үлэ нэдиэлэтэ алтынньы 27 күнүттэн сэтинньи 1 күнүгэр диэри буолуоҕа. "Сомоҕолоһуу күнүн иннинэ…
Бүгүн, балаҕан ыйын 15 күнүгэр, Дьокуускайга сарсыарда хойуу туман түһэн, көтүөхтээх рейстэр тардыллыбыттар. Пресс-сулууспа иһитиннэрэринэн, көтөр-түһэр…
Дьокуускайга элбэх кыбартыыралаах дьиэлэргэ уонна социальнай эбийиэктэргэ ититиини биэрии тиһэх түһүмэҕэр сылдьар. Бүгүн сарсыардааҥҥы туругунан…