Социальнай хайысхалааҕын бэлиэтиир

Ил Түмэн спикерэ Алексей Еремеев Ил Дархан СӨ Судаарыстыбаннай Мунньаҕар (Ил Түмэҥҥэ) туһаайан этиитигэр бэйэтин санаатын үллэһиннэ:

-Бүгүн Ил Дархан Ил Түмэҥҥэ этиитин ис хоһооно социальнай хайысхалааҕын бэлиэтии иһиттим. Бу уустук кэмҥэ судаарыстыба аһаҕастык эппит социальнай эбэһээтилистибэлэрэ барыта толоруллубуттар.  Биһиги бүддьүөппүтүгэр балачча уустук балаһыанньалаах да буолларбыт, экэниэмикэ да, тутуу да, тыа хаһаайыстыбата да, социальнай эйгэ да буоллун, өрөспүүбүлүкэбитигэр сайдыы бара турар. Ол тэтими ыһыктыбакка кэлэр сылга ону өссө күүһүрдэн, чаҕылхай түмүктэри ситиһиэхтээхпит диэтэ.

2026 сылы Арассыыйа үрдүнэн Норуоттар сомоҕолоһууларын сылынан биллэриллибитэ, онно сөп түбэһиннэрэн Ил Дархаммыт кэлэр сылы Култуура сылынан биллэрбитэ саамай сөп. Хас биирдии норуот култууралаах, үгэстэрдээх, ону сайыннардаҕына чахчы норуоттар сомоҕолоһуулара, биир ньыгыл буолуулара ситиһиллиэҕэ.