Туһалаах дьарыктары сэргээннэр

Нам улууһугар Аппааныга нэһилиэк бэтэрээннэрин (сал.Лебедева О.И.) уонна дьахталлар сэбиэттэрин (сал. Мальцева Д.И.) кэмитиэттэрэ аҕам саастаахтары аралдьытар, сынньатар сыаллаах араас дьарыктары, бэйэлэрин ортолоруттан араас дьоҕурдаахтары туһанан ыыталлара үтүө үгэскэ кубулуйда.

Ол курдук, быйылгы сезоҥҥа араас оҥоһуктарга, иис көрүҥнэригэр сэргэх тэрээһиннэр ыытыллалларын таһынан, ыллыырга сөпкө тыыныы, ырыаҕа дьарык, уо.д.а. аҕам саастаахтарга доруобуйаларыгар туһалаах дьарыктар тиһиктээхтик ыытыллаллар. Маннык бэртээхэй уонна дьон сонургуур, сэргэхсийэр дьарыктарын М.А. Аммосова уоттаахтык-күөстээхтик  ыытан саҕалаата.

Манна урукку кэмҥэ сценаҕа элбэхтик ыллаабыт дьон, сцена бэтэрээннэрэ үөрэ-көтө кэлэллэр. Элбэҕи билэллэрин сэргэ, саастыылаахтарын кытары астына сэһэргэһэллэрин, хааман-сиимэн сибиэһэй салгынынан дуоһуйа тыыналларын, доруобуйаларыгар туһалааҕы оҥостоллорун бэлиэтииллэр. Маннык түмсүүлээх дьон инники былааннара элбэх.

Нина Саввина,

Аппааны, Нам.

Ааптар хаартыскаларга түһэриитэ.