«Туһалаах мэхэньиисим киирбитэ”

Бүгүн өрөспүүбүлүкэ Ил Дархана Айсен Николаев Ил Түмэҥҥэ туһаайан этиитин иһиттибит. Түгэнинэн туһанан, “Чурапчы” ТХПК бэрэссэдээтэлэ Николай Петров санаатын маннык үллэһиннэ:

—  Ил Дархаммыт Айсен Сергеевич Николаев этиитин тыа сирин олохтоохторо иһиттибит. Улуустарга тыа хаһаайыстыбатын боломуочуйатын биэрии түмүктэрин туһунан эттэ. Кырдьык, туһалаах мэхэньиисим киирбитэ. Биллэрин курдук, төбөҕө бэриллэр субсидияттан аккаастаммыт сорох дьон үүккэ көспүттэрэ. Ол эрээри итинтэн тахсыбыт кэмчилээһин төттөрү бүддьүөккэ барбыта хомолтолоох. Үүккэ бэриллибитэ буоллар, тыа сирин олохтоохторун үүтү туттарыыга  интэриэстэрэ өссө улаатыа этэ. Онон тыа хаһаайыстыбатыгар туһаны  аҕалар бу бэртээхэй мэхэньиисиммитин өссө тупсаралларыгар уонна тыа хаһаайыстыбатыгар каадырдары олохсутууга субсидиялаах дьиэ тутуута инникитин көрүллэригэр баҕарабыт.   Мин чуолаан, култуура туһунан этиитин сэргээтим.