Хаартыска: Нина Саввина тиксэриитэ
Биһиги Москваҕа «Бэс Чагда» санаторийга Намтан сэттиэ буолан эрдэттэн былааннанан, ох курдук оҥостон, кустук курдук куоһанан кэлбиппит. Сүрүн сыалбыт — Кыайыы 80 сылынан айан.
Санаторийга эмтэнэрбит, чэбдигирэрбит таһынан сынньанааччылар иллэҥ кэмнэрин атаарарга аналлаах бэртээхэй култуурунай тэрээһиннэри көтүппэппит. Аида Васильевна Макарова дьону эрэ сэргэхситэр, саастарынан интэриэстэрин табан былаанныыр, тэрийэр, билиини-көрүүнү биэрэр тэрээһиннэри бэрт сатабыллаахтык толкуйдуур.
Биир оннук тэрээһининэн Улуу Кыайыы 80 сылынан Кыайыы Храмыгар сырыттыбыт. Түмэл комплексын устун Улуу Кыайыыга тириэрдэр Аҕа дойдуну көмүскүүр уоттаах сэрии хас биирдии күнүн суолунан хаамыыны оҥороҕун. Ол кэмнэрдээҕи кырыктаах кыргыһыы биллэр, историяҕа кэпсэнэр түгэннэрин көрдөрөр, кэпсиир кэллиэксийэлэр, докумуоннар, хаартыскалар, хартыыналар, макеттар, видеонан матырыйааллар киһини улаханнык долгуталлар, уйадыталлар.
Галерея устун баран истэххэ, хас биирдии тематическай саала ахсын туруоруллубут интерактивнай панелларга киирэн Аҕа дойду кыттыылаахтарын туһунан информацияны булан көрүөххэ сөп. Маныаха иһитиннэрии ситэтэ суох буоллаҕына, анал саайтка киирэн толорон, ситэрэн-хоторон биэриэххэ сөп эбит. Онон дьон-сэргэ улаханнык кэрэхсээбит. Билиэн-көрүөн да баҕалаах олус элбэх.
Биһиги манна сылдьан бука барыбыт сүрэхпитигэр иҥмит Улуу Кыайыы 80 сылынан, Аҕа дойду уоттаах сэриитигэр кыттан Кыайыыны аҕалсыбыт тапталлаах, күндүтүк ахтар-саныыр аҕаларбыт, эһэлэрбит, таайдарбыт, абаҕаларбыт, чугас дьоммут туһунан информацияны булбуппут олус долгутуулаах буолла. Үөрдүбүт даҕаны, кистии-саба ытастыбыт даҕаны. Онон анаан оҥостон, эрдэттэн толкуйданан кэлбит сыалбытын-сорукпутун толордубут диэн үөрэбит. Ытык дьоммут барахсаттары ахтан-санаан тураммыт хоолдьуктаах бэйэбит хоҥкуйабыт, сүһүхтээх бэйэбит сүгүрүйэбит.
Аҕаларбыт тустарынан кылгастык сырдаттахха:
1. Эверстов Гаврил Ильич — Арҕаанны фроҥҥа сэриилэспитэ, хорсунун иһин мэтээллэрдээх, учууталынан, оскуола сэбиэдиссэйинэн үлэлээбитэ.
2. Левин Лев Львович — Илиҥҥи фроҥҥа сылдьыбыта, хорсунун иһин мэтээллэрдээх, Саха АССР биллэр рационализатор-механизатора, Ленин орденын кавалера.
3. Павлов Семён Петрович — Карл Маркс аатынан колхуос, М.К.Аммосов аатынан сопхуос кылаабынай буҕаалтыра, Аҕа дойду сэриитин кыттыылааҕа, «Килбиэнин иһин» 3-с истиэпэннээх орден кавалера, бойобуой мэтээллэрдээх.
4. Габышев Игнатий Петрович — сэриигэ хорсунун иһин мэтээллэрдээх, сэрии кэнниттэн тутууга биригэдьииринэн үлэлээбитэ. Аппааныга саҥа кулуубу туттарбыта, сүрүн уулусса былаанын оҥорбута.
5. Габышев Тимофей Петрович — Илиҥҥи фроҥҥа сылдьыбыта, хорсунун иһин мэтээллэрдээх, Сэбиэт бэрэссэдээтэлинэн, пиэрмэҕэ биригэдьииринэн, ыскылаат сэбиэдиссэйинэн үлэлээбитэ.
6. Евсеев Иван Максимович — Арҕаанны фроҥҥа разведчигынан, Ленинград уобалаһыгар сылдьыбыта, комсомол сэкирэтээринэн үлэлии сылдьан сэриигэ ыҥырыллыбыт. Сэрииттэн төннүбэтэх.
Нина Саввина
Хаартыскалар: Нина Саввина тиксэриилэрэ
Cаха сирин синоптиктарын сабаҕалааһыннарынан бүгүн, ахсынньы 24 күнүгэр, Арктика кытылынан сорох сиринэн хаардыыр. Бу туһунан…
Өрөспүүбүлүкэтээҕи "Оһуокай" түмсүү Дархан этээччитэ Лариса Николаевна оскуола үөрэнэччилэрин дьарыктаабыта ыраатта. Туйах хатарааччылаах бастыҥ этээччибит…
Айсен Николаев Олоҥхо тыйаатырын Саха сирин норуоттарын култуурунай баайын эбийиэгинэн билинэр туһунан Ыйаахха илии баттаата.…
Дьокуускайга 4 №-дээх полиция отделын дьуһуурунай чааһыгар дьахтар суумкатын уордарбытын туһунан сайабылыанньа суруйбут. Кини киин…
Алааска, тыаҕа сылдьан хаһыытыыры, улаханнык айдаарары боболлорун билэргит буолуо. Ону таһынан өссө тугу сэрэтэллэрий, өйдөтөллөрүй?…
Айсен Николаев Судаарыстыбаннай Мунньахха (Ил Түмэҥҥэ) туһаайан этиитигэр дьиэ кэргэннээх үлэһиттэри өйүүр миэрэлэри олоххо киллэрэргэ…