Туймаада ыһыаҕар өрөспүүбүлүкэ инновационнай ситиһиилэрин билиһиннэрдилэр

Ил Дархан Айсен Николаев Туймаада ыһыаҕын кэмигэр Үс Хатыҥҥа «Саха Инновации – 2025» өрөспүүбүлүкэтээҕи быыстапкаҕа Саха сирин саҥаны айааччыларын бырайыактарын сыаналаата.

«Технопарк «Якутия» түһүлгэтигэр ИТ, биотехнология уонна да атын хайысхаларга бырайыактар туруорулуннулар. Айсен Николаев быыстапка технологическай урбааны сайыннарар уонна эрэгийиэн инновационнай эйгэтин кэҥэтэр аһаҕас былаһаакка быһыытынан суолтатын бэлиэтээтэ: «Быыстапка биһиги өрөспүүбүлүкэбит баай култууралаах, үгэстэрдээх эрэ буолбакка, интеллектуальнай уонна научнай-тиэхиньиичэскэй кыахтааҕын чаҕылхайдык көрдөрөр. Бу биһиги киэн туттуубут уонна кэскилбит тирэҕэ».

Ийэ дойдуну көмүскээччитэ сылын чэрчитинэн көрдөрүллүбүт оҥоһуктар көрөөччүлэр ураты болҕомтолорун тарта: «Зеленая энергия» хампаанньа «Тимир-Ат» электро-эндурота, «Саха-Дрон» пилота суох көтөр аппарааттара, «Бул» радиоэлектроннай охсуһуу сириэстибэлэрин бырайыага, ону тэҥэ «Илии сылааһа» баҕа өттүнэн хамсааһын уонна өрөспүүбүлүкэ ПСКА-тын этэрээтин ураты экспозициялара.

Ыалдьыттар бырайыактар экологическай хайысхалаахтарын бэлиэтээтилэр — хотугу үүнээйилэртэн оҥоһуллубут натуральнай косметикаттан саҕалаан, Саха сирин айылҕатын баайын уонна ырааһын харыстаан көрдөрөр чэйдэргэ уонна эко-табаардарга тиийэ.

Быыстапка сыыппара уонна үөрэхтээһин эйгэтигэр араас көҕүлээһиннэри билиһиннэрдэ: «Expo Skills» IT-оскуола оонньуу ньыматынан үөрэтиитэ, «Криолит Геймс» саҥа оонньуу бородууксуйалара, «21-с оскуола» уонна «Синергия» университет бырагыраамаларын билиһиннэриилэрэ, ону тэҥэ «YKT» сыыппара платформатыттан технологичнай аралдьыйыылар, диэн СӨ Ил Дарханын уонна Бырабыыталыстыбатын пресс-сулууспата иһитиннэрэр.