Туймаада ыһыаҕар Индия, Казахстан уонна Кытай ыалдьыттара кэллилэр

Быйылгы Туймаада ыһыаҕар Казахстаантан, Индияттан, Кытайтан, ДНӨ-тэн уонна дойду атын эрэгийиэннэриттэн дэлэгээссийэлэр кэллилэр.

Ыһыах Арассыыйаҕа саамай улахан национальнай бырааһынньыгынан ааҕыллар, диэн Ил Дархан  Айсен Николаев бэлиэтээтэ.

Туймаада Ыһыаҕа Аҕа дойду Улуу сэриитигэр Кыайыы 80 сылыгар, дойдуга Аҕа дойдуну көмүскээччи сылыгар уонна Саха сиригэр Ийэ дойдуну көмүскээччи сылыгар ананар.

«Биллэн турар, ыһыах номнуо Саха сирин улахан визитнэй карточкатынан буолла. Бу – Арассыыйа сиригэр-уотугар саамай улахан национальнай бырааһынньык. Бу күннэргэ ыалдьыт ааспыт сыллааҕар итэҕэһэ суох буолуо диэн эрэнэбин. Уонна, биллэн турар, ыһыах бэйэтин ис дьиҥэр дьону түмэр, үтүө кыайыытын кэрэһэлиир. Бу буоллаҕа, аан дойду араас муннугуттан дьону биһиэхэ тардар күүһэ. Бүгүн атын дойдулартан, дойду үгүс эрэгийиэннэриттэн олус элбэх киһи сырытта.

Биһиэхэ Донецкай Норуодунай Өрөспүүбүлүкэтин куораттарыттан доҕотторбут кэлбиттэрэ олус улахан суолталаах. Бу биһиги бары биир сомоҕо буоларбытын көрдөрөр», – диэн Айсен Николаев бэлиэтээтэ.

Санатан эттэххэ, ааспыт сылга Туймаада ыһыаҕар 230 тыһыынчаттан тахса киһи сылдьыбыта.