Туймаада ыһыаҕар — «Утум Уус» кыайыылаахтара

Туймаада ыһыаҕар «Утум Уус» уустар өрөспүүбүлүкэтээҕи бэстибээллэрэ өрө көтөҕүллүүлээхтик ыытылынна.

Далааһыннаах тэрээһин П.А.Ойуунускай аатынан Судаарыстыбаннай бириэмийэ лауреата, СӨ Духуобунас академиятын академига, култуура үтүөлээх үлэһитэ, норуот маастара, Таатта улууһун Бочуоттаах гражданина Борис Федорович Неустроев — Мандар Уус 80 сааһыгар ананна.

Ыалдьыттар уонна кыттааччылар өрөспүүбүлүкэ бастыҥ уустара саха быһаҕын охсон көрдөрөр маастар-кылаастарыгар сырыттылар, хомуһу оҥороллорун уу харахтарынан көрдүлэр. Быыстапка былаһааккатыгар бииртэн-биир болҕомтону тардар оҥоһуктар көрдөрүүгэ уурулуннулар.

Бэстибээлгэ Ил Дархан Айсен Николаев сырытта. Кини маннык тэрээһиннэр кэнчээри ыччакка туһалаахтарын, элбэҕи биэрэллэрин, иҥэрэллэрин бэлиэтээтэ.

Тэрээһин бочуоттаах ыалдьытынан Арассыыйа Дьоруойа, Арассыыйа комсонавтарын этэрээтин хамандыыра Олег Кононенко буолла. Кини саха быһаҕын таптайыыга холонно. Итиэннэ маастар Айгын Уус илиититтэн саха быһаҕын бэлэх тутта.

Түмүккэ бастыҥнар ааттаннылар. Ол курдук, «Бастын саха быhаҕа»» номинацияҕа — Мэҥэ Хаҥалас улууһуттан кыттыыны ылбыт Николай Костромин ааттанна. Иккис бириистээх миэстэҕэ Александр Михайлов (Нам), үһүскэ — Илья Готовцев (Уус Алдан) тигистилэр.

«Бастын бадаайы» анал аакка Николай Костромин тигистэ. Кини кэнниттэн тилэх үктэһэн Александр Михайлов уонна Егор Ефимов (Чурапчы) ааттаннылар.

«Туругур Туймаада хомуһа»  күрэскэ Феликс Комиссаров (Томпо) кыайда. Иккис — Спиридон Иванов (Уус Алдан), үһүс — Роман Иванов (Мэҥэ Хаҥалас) буоллулар.

Эдэрдэргэ эмиэ бэрт сытыы киирсии буолла. «Утум Уустар» категорияҕа Эрсан Макаров (Чурапчы) уонна Егор Оконешников (Мэҥэ Хаҥалас) ааттанан үөрүү-көтүү өрөгөйө буолла. «Бастын уус-уран оҥоhуулаах саха быhаҕа» номинацияҕа Дьааҥы улууһун ууһа Сергей Потапов оҥоһуга ааттанна. «Бастыҥ уус-уран оҥоhуулаах тимир оҥоһук» диэҥҥэ Дьокуускайтан кыттыбыт Алексей Апросимов тигистэ.

Сиһилии: https://www.sakha.gov.ru/news/7380

СӨ Ил Дарханын уонна Бырабыыталыстыбатын пресс-сулууспата