Туймаада Ыһыаҕын иккис күнүгэр сарсыардааҥҥыга диэри оһуохайдыахтара

Бастыҥ оһуохай таһаарааччыны кини этэригэр хас киһи эргииргэ киирбитинэн ааҕыахтара.

Бэс ыйын 29 күнүгэр Туймаада Ыһыаҕар “Туймаада ыһыаҕын оһуохайа” оһуохайдьыттар куонкурустара саҕаланна. Үс категориянан кыттааччылар күн тахсыар диэри Арассыыйаҕа уонна Саха сиригэр 2024  сылга биллэриллибит Дьиэ кэргэн уонна Оҕо саас сылларын хоһуйан төгүрүччү хаама сылдьан этиэхтэрэ.

Быйыл “Оһуохай” айар түмсүү уонна Дьокуускай куорат дьаһалтата үс бөлөҕүнэн куонкуруһу ыыталлар: Аар Дархан этээччилэр, үтүөлээх этээччилэр уонна саҥа саҕалааччылар.

Оһуохай түһүлгэҕэ (4-с былаһаакка) күн тахсыар диэри эҥсиллиэ. Сарсыарда түөрт чааска финал буолуоҕа. Кыайыылаахтары бэс ыйын 30 күнүгэр быһаарыахтара. Наҕараадалааһын кэнниттэн бары баҕалаахтар киирэн оһуохай таһаарыахтара.

Жюри чилиэннэрэ уонна “Оһуохай” түмсүү салалтата тустаах тиэмэлэри арыйыыларын, муусуката сөп түбэһиитин уонна оһуохайдьыт бэйэтин түһүлгэтигэр хас киһини муспутунан быһаарыахтара.

Куонкурус саҕаланыытыгар 30 тахса киһи кыттарын биллэрбитэ. Кинилэр Сунтаар, Уус Алдан, Мэҥэ Хаҥалас оройоуннарыттан уонна Дьокуускайтан кэлбиттэр. Төрөөбүт оройуоннарыгар биллэр оһуохайдьыттар  уонна саҥа холонооччулар бааллар диэн СИА-ҕа уопсастыба бэрэссэдээтэлин солбуйааччы Марта Николаева кэпсээтэ.

Куорат салалтата куонкурус пуондатыгар 100-түү тыһыынча солкуобайдаах үс сэртипикээти туруорда. Үтүөлээх этээччилэр ортолоругар кыайыылаахтар Аар Дархан аатын ылыахтара. Саҥа саҕалааччыларга анал бириистэри олохтоотулар.

Саха сирин олохтоохторун талааннарын туһунан өрөспүүбүлүкэҕэ сырыытын кэмигэр Арассыыйа Бэрэсидьиэнэ Владимир Путин бэлиэтээбитэ. Онно судаарыстыба баһылыга Муусука Үрдүкү оскуолатыгар таарыйбыта.

СИА.