Туймаада ыһыаҕын күннэригэр сөрүүн буолуоҕа

Дьокуускайга уонна киин улуустарга Туймаада ыһыаҕын күнүгэр, бэс ыйын 29-30 күннэригэр, сөрүүн буолуоҕа. Гидрометеокиин салайааччыта Татьяна Маршалик халлааммыт кэлэр нэдиэлэттэн биирдэ кыралаан сылыйарын туһунан иһитиннэрдэ.

“Бу нэдиэлэ бастакы күннэригэр өрөспүүбүлүкэ киин улуустарыгар бүтэһик итии күннэр турбуттара. Бэс ыйын 26 күнүттэн саҕалаан халлаан сөрүүкүө, быһа холоон, +25 кыраадыс курдук буолуо. Күнүһүн кыралаан ардыаҕа, былыттаах буолуоҕа. Сөрүүн салгын Хотугу Муустаах байҕал диэкиттэн кэлбитинэн кэлэр күннэргэ күнүскү өттүгэр +15…+20С кыраадыс буолара күүтүллэр. Онон, Туймаада ыһыаҕын кэмигэр биллэ сөрүүкүө”, – диэн Татьяна Маршалик кэпсиир.

“Тымныы салгын балаһата Дьааҥы хайаларын туораан, илин эҥээр улуустарынан Лаамы байҕалыгар тиийиэҕэ. Ол киин улуустары эмиэ хабыаҕа. Кэлэр нэдиэлэттэн халлаан кыралаан сылыйан, +28С кыраадыска диэри тиийиэҕэ”, – диир Татьяна Маршалик.

Халлаан биллэ сөрүүкүүрүнэн сибээстээн, Туймаада ыһыаҕар хойукка диэри сылдьааччылар эрдэтинэ сылаастык таҥнан сылдьарга барытын хааччынарга сүбэлииллэр.