Туймаада ыһыаҕын ыалдьыттарыгар умнуллубат бэлэх

Быйыл Индия дэлэгээссийэтэ Туймаада ыһыаҕын биир бочуоттаах ыалдьытынан буолла.

Ил Дархан Айсен Николаев суруналыыстарга: “Туймаада ыһыаҕа сырдыгы, үтүөнү саҕар сомоҕолоһуу бырааһынньыгынан буолар. Ол да иһин быйыл суолталаах тэрээһиҥҥэ Индияттан, Кытай Норуодунай Өрөспүүбүлүкэтиттэн, Казахстантан уонна Арассыыйа араас эрэгийиэннэриттэн үгүс дэлэгээссийэ кэлэн кыттыыны ылла”, — диэн бэлиэтээтэ.

— Туймаада ыһыаҕа элбэх да дьону түмэр, сомоҕолуур эбит. Олус сырдык, эйэлээх тыыннаах бырааһынньык.

Индия Арассыыйаҕа Боломуочуйалаах посола Никилеш Гирини кытта Ил Дархан Айсен Николаевы уонна Дьокуускай куорат мээрэ Евгений Григорьевы кытта көрсөн кэскиллээх былааннары торумнаатыбыт.

Биир оннук бырайыак “Индия сайына” киинэ бэстибээлэ бу өрөбүлгэ саҕаланна, — диэн санаатын үллэһиннэ Владивостокка Индия Өрөспүүбүлүкэтин генеральнай консула Сиддард Говрав.

Ил Дархан Айсен Николаев Индия дэлэгээссийэтигэр Туймаада ыһыаҕар сылдьыбыт ытык бэлиэнэн буолар умнуллубат бэлэҕи – Өлүөнэ очуостарын хартыынатын бэлэхтээтэ.